Atvinnulíf

Hugmynd fyrir ári orðið að vinsælum Facebookleik

Rakel Sveinsdóttir skrifar
Rúna Magnúsdóttir.
Rúna Magnúsdóttir. Vísir/Vilhelm

„Fyrir ári síðan, rétt þegar önnur COVID bylgjan var að skella á, fékk ég þessa flugu í kollinn á göngu í Elliðarárdal. Mér fannst einhvern veginn allt framundan vera svo undirlagt af alvarleika, mikil þyngsl í fólki, veturinn að koma og myrkrið á næsta leiti,“ segir Rúna Magnúsdóttir aðspurð um það hvernig Facebook-leikurinn Game of Boxes kom eiginlega til. Leikurinn stendur yfir í 21 dag og gengur út á að fólk virkjar ímyndunaraflið sitt til þess að brjótast út úr viðjum vanans og viðhorfum sem eru að hefta þau.

Peningaboxið opnað

No More Boxes er aðferðarfræði og lífstíll sem fólk nýtir sér til að festast ekki í þegar mótuðum viðhorfs- og hegðunarmynstrum, en að sögn Rúnu stýrist um 95% af hegðun fólks, viðhorfi og viðbrögðum af því sem við erum fyrirfram búin að gefa okkur.

Þjálfunin gengur út á að hjálpa fólki til að nýta betur þau tækifæri sem það hefur.

Hvort sem það er í starfsframa, í einkalífi eða í fjármálum.

Það er gert með því að þjálfa fólk í að brjóta sig út úr þeim fyrirfram mótuðu „boxum“ sem flestir hafa fest sig í, oft án þess að gera sér grein fyrir því.

Facebook leikurinn Game of Boxes er sá hluti sem snýr að fjármálum.

„Leikurinn gengur út á að breyta viðhorfi okkar til peninga og fjármagns. Við köllum það að opna á peningaboxið okkar,“ segir Rúna og bætir við: „Þú sérð, líkaminn okkar gerir engan greinamun á því hvort að hluturinn sem við erum að upplifa er að gerast núna eða hvort þetta eru tilfinningar sem fylgja í raun einhverjum minningum.“

Í þær þrjár vikur sem fólk tekur þátt í leiknum, fær það ímyndaða peningagjöf á hverjum degi. Fyrst tíu dollara, síðan tvöfalt þá upphæð, síðan þrefalda og svo framvegis.

Dagleg þátttaka snýst síðan um að fólk þarf að skrá færslu um það hvernig það eyddi peningnum þann daginn.

Dæmi: „Ég keypti mér góðan kaffibolla á Te & Kaffi og fékk með súkkulaðimola.”

Næsta dag hefur upphæðin tvöfaldast og þú færð ímyndaða tuttugu dollara senda til þín og þannig gengur þetta fyrir sig í þrjár vikur.

Sem þýðir að í lok leiksins þarftu að deila því með hópnum hvernig þú ætlar að ráðstafa 10,4 milljónum dollara eða sem samsvarar um 1,3 milljarði íslenskra króna.

Rúna segir að fljótlega í leiknum fari fólk að átta sig á ákveðnu mynstri hjá sér þegar kemur að peningum. Þessu fylgi oft ýmsar frásagnir sem fólk upplýsir um.

Til dæmis að það segi frá því að þegar það ólst upp hafi aldrei verið til nægur peningur. Þetta hafi síðan haft mikil áhrif á samband fólks við peninga síðar meir um ævina.“

Í lok leiksins upplifa flestir leikmenn gjörbreytt samband við peninga.

„Margir tala um að hugarfarið sitt hafa breyst algerlega. Peningur er ekki áhyggjuefni lengur. Margir segjast sofa betur því að áhyggjurnar fóru út um gluggann,“ segir Rúna.

Rúna hvetur fólk og fyrirtæki til að hugsa út fyrir boxið og prófa áfram hugmyndir sem það fær, stórar sem smáar.Vísir/Vilhelm

Tækifæri oft svo einföld

Að No More Boxes standa Rúna Magnúsdóttir leiðtogamarkþjálfari og fyrirlesari, búsett á Íslandi. Nicholas Haines, nálastungulæknir og sérfræðingur í kínverskum orkufræðum forstjóri Five Institute í Bretlandi, Dr. David Paul sem er ástralskur sérfræðingur í breytingastjórnun fyrir stærri samfélög.

Tekjumódel No More Boxes er sambærilegt og víðast hvar þekkist, fólk greiðir fyrir þjálfun eða þátttöku á námskeiðum. 

Það sama gildir um Game of Boxes-leikinn á Facebook. Fyrir hann er greitt eins og námskeið og tekur fólk síðan þátt á lokuðum Facebook-síðum.

Leikurinn hefur hingað til farið fram á ensku.

Rúna segir leikinn gott dæmi um hvernig nýjar hugmyndir og leiðir geta opnað ný tækifæri án þess að vera flókin eða kostnaðarsöm.

Það hafi til dæmis aðeins tekið um sex vikur að fara af stað með fyrsta leikinn af stað.

Og þó voru þátttakendur þá strax um 100 talsins og víðs vegar að úr heiminum.

Enn er ekki fyrirséð hvernig málin munu þróast.

Rúna nefnir dæmi:

Kona sem spilaði leikinn með okkur í vor er markþjálfi í Ísrael. Hún segir leikinn hafa breytt mjög miklu fyrir sig og óskaði eftir leyfi til að stýra leiknum með hópi af fólki frá Ísrael. 

Það skýrir það út að frá byrjun september hafa um 160 manns verið að spila leikinn okkar saman. Á hebresku!“

Rúna hvetur fólk og fyrirtæki til að hugsa út fyrir boxið, leyfa sér að nota leik til að þjappa hópinn saman, byggja upp vinnustaðamenninguna, prófa áfram hugmyndir sem það fær, stórar sem smáar.

Hún nefnir leikinn sem dæmi og segir:

„Að hugmynd í COVID göngutúr í Elliðárdalum geti ári síðar umbreytt lífi hundruði manna og kvenna víða um heim er til dæmis meira en ég hefði nokkurn tímann getað ímyndað mér.“


Tengdar fréttir

Að hvetja okkur til dáða í vinnu: Segðu hlutina upphátt!

Það er með ólíkindum hvernig okkur tekst að rífa okkur niður í huganum. Eða gera lítið úr okkur. Ef okkur gengur til dæmis mjög vel í vinnunni og náðum að afkasta miklu, erum við samt meira með hugann við verkefnin sem við náðum EKKI að klára frekar en að vera ánægð með allt sem við þó gerðum!

Í rekstur „með mömmu sem er alltaf til í allt“

„Aldursmunur dætranna hefur gert það að verkum að þær hafa ekki gert allt of mikið saman um ævina og þegar þessi hugmynd kom upp í huga okkar ákváðum við að með þessu væri hægt að eiga sameiginlegt markmið til að stefna að með mömmu sem er alltaf til í allt,“ segir Vilborg Norðdahl sem skömmu fyrir síðustu jól hóf rekstur með tveimur dætrum sínum undir nafninu Verzlanahöllin að Laugavegi 26.

19 ára með sitt eigið umhverfisvæna framleiðslufyrirtæki

Hulda Fanný Pálsdóttir er 19 ára gömul og búsett í Garðabæ. Þrátt fyrir ungan aldur, er hún búin að stofna fyrirtæki sem heitir AKA og selur töskur sem hún hannar og framleiðir sjálf. Það sem gerir AKA töskurnar sérstakar er að þær eru unnar úr sætisbeltum og leðursætum úr bílum.

Leið til að hætta ekki við góðar hugmyndir

Langar þig að stofna þinn eiginn rekstur? Eða ertu með einhverja góða hugmynd fyrir vinnuna, sem þú þorir ekki að velta í framkvæmd? Hér rýnum við í það hvað getur verið að aftra fólki frá því að fylgja hugmyndum eftir.

Góð ráð til að sporna við „ofhugsunum“

Að ofhugsa eða verja óendanlegum tíma í að greina hluti og kryfja þá er vandamál sem margir kannast við. Heilu dagarnir geta farið í þessar hugsanir, sem þó leiða oft ekki til neinna lausna.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×