Innlent

Lög­maður Kol­beins segir réttar­gæslu­mann Jóhönnu hafa lagt til 300 þúsund krónur

Kolbeinn Tumi Daðason skrifar
Kolbeinn Sigþórsson í umspilsleiknum gegn Rúmeníu síðasta haust.
Kolbeinn Sigþórsson í umspilsleiknum gegn Rúmeníu síðasta haust. VÍSIR/VILHELM

Lögmaður Kolbeins Sigþórssonar segir að réttargæslumaður Jóhönnu Helgu Jensdóttur hafi lagt til að Kolbeinn greiddi Jóhönnu 300 þúsund krónur í miskabætur. Vísar hann til tölvupósts frá réttargæslumanninum hvað þetta varðar.

Á endanum greiddi Kolbeinn sex milljónir króna samanlagt til tveggja kvenna og Stígamóta þótt sú fjárhæð hafi ekki verið í neinu samræmi við atvik málsins að mati lögmannsins.

Það var haustið 2017 sem tvær konur kærðu Kolbein til lögreglu og sökuðu hann um kynferðisbrot og líkamsárás á skemmtistaðnum b5 í Bankastræti. Málinu lauk með því að Kolbeinn greiddi þeim vorið 2018 1,5 milljón króna, hvorri fyrir sig, í miskabætur og þrjár milljónir króna til Stígamóta.

Hafnaði því að hafa beitt ofbeldi

Kolbeinn hafnar því þó að hafa beitt konurnar ofbeldi eða áreitt en segir hegðun sína ekki hafa verið til fyrirmyndar. Hann hafi beðið konurnar afsökunar á hegðun sinni og fallist á kröfu þeirra um miskabætur.

Konurnar lýsa því að hafa verið með áverka eftir árásina og sýndi Jóhanna myndir af marblettum á handlegg í kvöldfréttum Stöðvar 2 á fimmtudag. Þá hefur fréttastofa upplýsingar um að Þórhildur Gyða Arnarsdóttir hafi ekki verið með sýnilega áverka en bólgur aftan á hálsi.

Hún hefur lýst því að Kolbeinn hafi tekið hana hálstaki en Jóhanna hvernig Kolbeinn hafi gripið harkalega í hana og dregið þannig að hún hafi verið mjög hrædd.

Almar Möller og Hörður Felix Harðarson, lögmenn hjá Mörkinni lögmannsstofu, gættu hagsmuna Kolbeins í málinu á sínum tíma.

Lögmenn Kolbeins svara fyrir sig

Hörður Felix skrifaði grein á Vísi í gær þar sem hann gagnrýndi þá ákvörðun stjórnar KSÍ að setja Kolbein úr hópnum í síðustu viku. Þá velti hann upp hvort eðlilegt væri að Kolbeinn stæði frammi fyrir því að missa lífsviðurværi sitt og vera útskúfaður úr samfélaginu vegna atviks sem átti sér stað fyrir fjórum árum og hann hefði gert upp og beðist afsökunar á.

Almar segir í tilkynningu til fréttastofu ekki rétt að Jóhanna og Þórhildur Gyða hafi fengið boð frá lögmanni um að skrifa undir þagnarskyldusamning gegn greiðslu 300 þúsund króna. Bæði Almar og Hörður neita að hafa lagt nokkuð slíkt til.

„Í kvöldfréttum Stöðvar 2 þann 2. september sl. var viðtal við Jóhönnu Helgu Jensdóttur þar sem hún lýsti upplifun sinni af atviki sem varð haustið 2017 á milli hennar og Kolbeins Sigþórssonar á skemmtistaðnum B5. Í viðtalinu staðhæfði Jóhanna að hún og Þórhildur Gyða Arnarsdóttir hefðu fengið boð frá lögmanni um að skrifa undir þagnarskyldusamning gegn greiðslu á 300.000 krónum,“ segir Almar.

Réttargæslumaður skoðaði dómafordæmi

Almar segist hafa komið fram fyrir hönd Kolbeins í þessum samskiptum og átti meðal annars samskipti við réttargæslumann Jóhönnu Helgu. Þann 3. apríl 2018 hafi honum borist svo hljóðandi tölvupóstur frá réttargæslumanninum:

„Hún sagðist mögulega vera tilbúin að falla frá kærunni gegn greiðslu miskabóta, bað mig að skoða það og heyra í þér. Ég kíkti á dómafordæmi og fyrir brot gegn 209./217. hafa miskabæturnar verið í kringum 300 þús kall.

Að teknu tilliti til þess geri ég eftirfarandi tillögu:

Miskabætur: 300.000,-

Lögmannskostnaður: 109.120,- (útkall (54þús) + 2 tímar (17þús))

ALLS: 409.120

Er þetta eitthvað sem þið gætuð mögulega fallist á?“

Almar vísar til þessa tölvupósts og segir staðhæfinguna um að lögmaður Kolbeins hafi boðið 300 þúsund króna miskabótagreiðslu því ranga. 

Segist aldrei hafa boðið þagnarskyldusamning

„Þetta gekk ekki eftir. Niðurstaðan varð sú að Kolbeinn greiddi samtals sex milljónir króna sem sáttargreiðslu þótt sú fjárhæð væri í engu samræmi við atvik málsins,“ segir Almar.

Þórhildur Gyða taldi í samtali við fréttastofu á dögunum að Hörður Felix Harðarson hefði líklega verið sá lögmaður sem fyrst var í samskiptum við hana og boðið fé gegn þagnarskyldu. Það hafi verið hennar skilningur á þeim tíma að hann væri ekki aðeins að vinna að málinu fyrir hönd Kolbeins heldur líka sambandið enda hafi hann boðið henni á fund með stjórnarmeðlimum KSÍ. 

„Það var okkar upplifun að hann væri á vegum KSÍ,“ sagði Þórhildur. Hörður Felix hafnar þessu.

„Konan sem steig fram, og hefur farið mikinn í fjölmiðlum, lýsti því svo að lögmaður á vegum KSÍ hafi haft samband við hana og boðað hana til fundar með meðlimum stjórnar KSÍ til að ganga frá „þagnarskyldusamningi“. Vakti þetta mikla athygli enda án nokkurs vafa fréttnæmt ef einhver á vegum sambandsins hefði gegnt þessu hlutverki. Síðar kom fram hjá umræddri konu að undirritaður hafi að líkindum verið sá lögmaður sem í hlut átti. Í þessari frásögn er hins vegar ekki eitt sannleikskorn. Undirritaður átti aldrei í samskiptum við konuna, var ekki að vinna fyrir KSÍ í þessu máli, boðaði ekki til fundar með stjórnarmanni KSÍ og bauð henni ekki á nokkrum tímapunkti „þagnarskyldusamning“,“ sagði Hörður Felix í grein sinni í gær.

Jóhanna sagði í viðtalinu á Stöð 2 á fimmtudag að hún ætlaði ekki að tjá sig frekar um málið. Hún hefði sagt allt sem hún ætlaði að segja og stæði með því.

Réttargæslumaður Jóhönnu miðar samkvæmt því sem fram kemur í tölvupóstinum við greinar 209 og 217 í almennum hegningarlögum við mat sitt á miskabótum fyrir Jóhönnu. Fyrri greinin snýr að því að særa blygðunarsemi en sú síðari að vægari tegundum líkamsárása.

Fréttin hefur verið uppfærð.


Tengdar fréttir

Gautaborg setur Kolbein til hliðar

Kolbeinn Sigþórsson kemur ekkert nálægt aðalliði Gautaborgar á meðan rannsókn á máli hans stendur yfir.

Harmar það að Kol­beinn saki hana um lygar

Þórhildur Gyða Arnarsdóttir segist harma það að Kolbeinn Sigþórsson, knattspyrnumaður, saki hana um lygar í yfirlýsingu sem hann sendi frá sér fyrir stuttu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×