Forsetinn með Mottumarsgrímu á afmælisráðstefnunni

Það var Valgerður Sigurðardóttir, formaður Krabbameinsfélagsins, sem setti ráðstefnuna og í kjölfarið hélt Hr. Guðni Th. Jóhannesson, forseti Íslands, hátíðarávarp. 

Fjallað var um stöðu krabbameina á Íslandi í víðu samhengi nú þegar Krabbameinsfélagið hefur starfað í 70 ár. Var það gert með hliðsjón af markmiðum félagsins, sem er að fækka nýjum tilfellum krabbameina, fjölga þeim sem lifa og bæta lífsgæði bæði þeirra sem greinast með krabbamein og aðstandenda þeirra.

Færri komust að en vildu og var góður andi í húsakynnum HR samkvæmt tilkynningu frá Krabbameinsfélaginu. Að lokum nutu gestir veitinga og gátu borið saman bækur sínar eftir fróðleg erindi og kynningar um stöðu krabbameina og krabbameinsrannsókna. Hér fyrir neðan má sjá fleiri myndir frá viðburðinum.