Nýr S-Class tengiltvinnbíll dregur 113 km

Kristinn Ásgeir Gylfason skrifar 31. júlí 2021 07:00

Nýr Mercedes-Benz S-Class í tengiltvinnútfærslu er nú kominn í sölu í Evrópu sem og á Íslandi. Nýr S-Class 580 e er með allt að 113km drægni á rafmagninu eingöngu samkvæmt WLTP staðli og hefur drægnin aukist um rúmlega helming miðað við eldri útfærslu bílsins. Þá býður bíllinn upp á 11kW hleðslugetu með hefðbundinni og 60 kW hraðhleðslugetu sem er það mesta meðal tengiltvinnbíla.

Meðfylgjandi er fréttatilkynning frá Öskju.

S-Class er flaggskip fólksbílaflota Mercedes-Benz og hefur bíllinn verið leiðandi í lúxus og tækni í gegnum árin.

Nýja tengiltvinnútfærsla bílsins er allt í senn langdrægari, aflmeiri og enn sparneytnari. Bíllinn er með 367 hestafla V6 bensínvél ásamt 150 hestafla rafmótor. Samanlagt er því drifrásin 517 hestöfl og togið er alls 750 Nm. Það er því gríðarlegt afl í þessari útfærslu S 580 e. Bíllinn rýkur úr kyrrstöðu í hundraðið á aðeins 5,2 sekúndum. Hámarkshraði bílsins er 250 km/klst.

Nýr S-Class er með fjórðu kynslóð af kerfi tengiltvinnbíla sem Mercedes-Benz hefur þróað. Bíllinn er gríðarlega vel búinn aksturs- og öryggiskerfum og með hátæknivæddan búnað sem gerir það að verkum að bíllinn getur stýrt sér að talsverðu leyti sjálfur þótt ökumaður sitji vissulega í ökumannssætinu og passi upp á að allt sé í lagi. Bíllinn er búinn miklum lúxus og þægindum eins og áður. Hann er m.a. með nýrri kynslóð MBUX afþreyingakerfisins.

Nýr S-Class og hinn nýi rafbíll EQS verða smíðaðir í verksmiðju Mercedes 56 í Sindelfingen, nálægt Stuttgart þar sem höfuðstöðvar þýska lúxusbílaframleiðandans eru til húsa.

S 580e er í boði í tveimur útfærslum með stutt hjólhaf sem og langt. Samkvæmt verðlista bílaumboðsins Öskju kostar bíllinn frá 21.990.000 kr.

Vistvænir bílar

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.