Miðflokkurinn boðar oddvitakjör í Reykjavík

Hallgerður Kolbrún E. Jónsdóttir skrifar 18. júlí 2021 11:45

Fjóla Hrund Björnsdóttir, framkvæmdastjóri Miðflokksins, og Þorsteinn Sæmundsson, þingmaður, sækjast bæði eftir oddvitasæti á lista flokksins í Reykjavíkurkjördæmi suður fyrir komandi Alþingiskosningar. Vísir

Stjórn Miðflokksins í Reykjavík hefur tekið ákvörðun um að boða til oddvitakjörs í Reykjavíkurkjördæmi suður eftir að tillaga uppstillinganefndar að framboðslista flokksins í kjördæminu var felld á félagsfundi síðastliðinn fimmtudag.

Þorsteinn Sæmundsson, þingmaður flokksins, og Fjóla Hrund Björnsdóttir, framkvæmdastjóri flokksins, etja kappi um oddvitasætið. Greint var frá því á föstudaginn að Þorsteinn hafi neitað að beygja sig undir áform uppstillinganefndar að vera ekki stillt upp sem oddvita á listanum og samkvæmt heimildum Vísis gekk hann í að smala samherjum sínum á fundinn til að fella tillöguna.

Tillagan var felld og stendur Miðflokkurinn frammi fyrir þeim vanda að raða á listann svo hann standi. Hefur því verið boðað til oddvitakjörs sem mun fara fram 23. og 24. júlí næstkomandi. Um er að ræða ráðgefandi atkvæðagreiðslu um val á oddvita, þar sem félagsmönnum stendur til boða að taka afstöðu til frambjóðendanna sem sóst hafa eftir að leiða listann.

„Mikill hugur er í Miðflokknum um að jafna hlut kynjanna og aldursdreifingu á framboðslistum. Mikið framboð hefur verið af hæfum konum og körlum og er það fagnaðarefni,“ segir í tilkynningu á vef Miðflokksins.

Miðflokkurinn Reykjavíkurkjördæmi suður

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.