Erlent

Sak­felldur fyrir kyn­ferðis­of­beldi gegn börnum niður í eins árs aldur

Hallgerður Kolbrún E. Jónsdóttir skrifar
Maðurinn var handtekinn síðasta sumar og húsleit gerð heima hjá honum þar sem meira en 2,5 milljón skjöl með barnaníðsefni fundust.
Maðurinn var handtekinn síðasta sumar og húsleit gerð heima hjá honum þar sem meira en 2,5 milljón skjöl með barnaníðsefni fundust. EPA/CHRISTINE OLSSON

Sænskur karlmaður á sjötugsaldri var í dag dæmdur í tíu ára fangelsi fyrir að hafa beitt börn á aldrinum eins til tólf ára kynferðislegu ofbeldi. Maðurinn var meðal annars ákærður fyrir að hafa nauðgað barni, kynferðislega brotið á átta börnum og að hafa átt barnaníðsefni.

Maðurinn var jafnframt dæmdur til að greiða meira en milljón sænskar krónur, eða um 14,4 milljónir íslenskra króna, í miskabætur. Maðurinn var jafnframt ákærður fyrir að hafa nauðgað fjórum börnum til viðbótar en var sýknaður af þeim ákæruliðum. Sænska ríkisútvarpið greinir frá. 

Brotin voru framin í Rikneby í Svíþjóð frá árinu 2016 til júní á síðasta ári. Talið er að maðurinn hafi boðið börnunum einhvers konar gjafir til að lokka þau heim til sín þar sem hann braut á þeim. Tólf börn voru brotaþolar í dómsmálinu en brot gegn einu barni til viðbótar hafði verið tilkynnt til lögreglu. Foreldrar barnsins vildu þó ekki fara með málið fyrir dómstóla.

Yngsta barnið sem bar stöðu brotaþola í málinu var eins árs þegar maðurinn braut á því. Börnin bjuggu öll í sama hverfi og karlmaðurinn og talið er að hann hafi verið þekktur meðal íbúa hverfisins og vel liðinn.

Maðurinn var handtekinn síðasta sumar og húsleit framkvæmd á heimili hans. Þar fannst gríðarlegt magn barnaníðsefnis og hefur lögreglan lýst því að hún hafi aldrei lagt hald á jafn mikið barnaníðsefni í einu. Við nánari skoðun á efninu kom í ljós að maðurinn hafði framleitt það sjálfur. Þá fannst einnig gríðarlegt magn af barnaníðsefni á tölvunni hans, sem hann hafði halað niður. Meira en 2,5 milljónir skjala með barnaníðsefni fundust á heimili hans.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.