Telja engar líkur á að finna fólk á lífi í rústunum

Atli Ísleifsson skrifar 8. júlí 2021 08:35

Hluti hins tólf hæða byggingar, Champlain Towers South á Surfside, hrundi um miðja nótt 24. júní. AP

Borgarstjóri í Miami-Dade á Flórída segir nú engar líkur vera á að finna fólk á lífi í rústum íbúðabyggingarinnar sem hrundi á Surfside í Miami 24. júní síðastliðinn. Því sé starfið þar nú ekki lengur skilgreint sem björgunaraðgerð heldur leitaraðgerð.

Þetta segir Daniella Levine Cava, borgarstjóri í Miami-Dade, en alls hafa lík 54 manna fundist í rústunum. Lík átján íbúa fundust í gær og er unnið að því að bera kennsl á lík þeirra. 86 er enn saknað.

Levine Cava segir að um gríðarlega erfiða ákvörðun hafi verið að ræða, en allt hafi verið gert til að finna fólk á lífi í rústunum.

Hluti hins tólf hæða byggingar, Champlain Towers South, hrundi um miðja nótt 24. júní.

Sérfræðingar frá Ísrael og Mexíkó hafa aðstoðað við leitina, en einnig hefur verið notast við sértækan búnað og sérþjálfaða leitarhunda.

It s with profound sadness that tonight we transition our operation from search and rescue to search and recovery.

May God bring peace to all whose hearts have been broken, and may He watch over our community in the hard days ahead. pic.twitter.com/EZgyaj78P1
— Daniella Levine Cava (@MayorDaniella) July 8, 2021

Bandaríkin Húshrun í Miami

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.