Tvö börn og fullorðinn urðu fyrir lestinni og morðrannsókn hafin

Hallgerður Kolbrún E. Jónsdóttir skrifar 7. júlí 2021 16:32

Þrír fórust þegar þeir urðu fyrir lest rétt fyrir utan Hässleholm í Svíþjóð í morgun. Þar af voru tvö börn. Getty/Robin Aron

Tvö börn og einn fullorðinn urðu fyrir lest fyrir utan Hässleholm í Svíþjóð í morgun og létust þau á vettvangi. Lögregla hefur þegar hafið morðrannsókn vegna slyssins og hafa ættingjar verið upplýstir um að börnin hafi látist.

Slysið varð um klukkan 10:45 að staðartíma og voru viðbragðsaðilar kallaðir út stuttu síðar. Viðbragð á vettvangi hefur verið mikið í allan dag, þar sem björgunarsveitarfólk, lögreglufólk og sjúkraflutningafólk hefur streymt að. Enn er ekki víst hvort fleiri hafi slasast í slysinu.

Allar lestarsamgöngur frá Hässleholm voru stöðvaðar eftir slysið og var farþegum lestarinnar gert að bíða í henni þar til um klukkan eitt í dag áður en rýming hófst. Vettvangi var lokað fyrir umferð um leið og lögreglu bar að garði og hefur lögregla staðið í ströngu við að taka skýrslur af vitnum að slysinu í dag.

Tæknilið lögreglu er enn á staðnum til að safna sönnunargögnum um það hvað nákvæmlega hafi átt sér stað. Robert Loeffel, talsmaður lögreglu, segir í samtali við sænska ríkisútvarpið að það muni taka nokkurn tíma.

Svíþjóð

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.