Heimsmarkmiðin

500 milljóna viðbótarframlag til COVAX

Heimsljós
Katrín Jakobsdóttir forsætisráðherra
Katrín Jakobsdóttir forsætisráðherra

Íslensk stjórnvöld hafa talað fyrir mikilvægi alþjóðlegrar samvinnu um þróun og framleiðslu bóluefnis og jafns aðgangs ríkja óháð greiðslugetu þeirra.

Katrín Jakobsdóttir forsætisráðherra tilkynnti í dag um 500 milljón króna viðbótarframlag Íslands til alþjóðlegs samstarfs um bættan aðgang að bóluefnum við COVID-19 (COVAX). Ísland hefur nú varið rúmum milljarði króna til að bæta aðgang þróunarríkja að bóluefnum gegn COVID-19. Forsætisráðherra tilkynnti um framlag Íslands á áheitaráðstefnu bólusetningarbandalagsins Gavi.

Katrín Jakobsdóttir, forsætisráðherra:

„Aðgangur jarðarbúa að bóluefnum er afar misjafn og afleiðingar heimsfaraldurs COVID-19 bitna ekki síst á konum og börnum. Ég lagði áherslu á mikilvægi þess að jafnréttissjónarmið verði höfð að leiðarljósi í dreifingu bóluefna.”

Íslensk stjórnvöld hafa talað fyrir mikilvægi alþjóðlegrar samvinnu um þróun og framleiðslu bóluefnis og jafns aðgangs ríkja óháð greiðslugetu þeirra. Neyðin er enn mikil og því brýnt að ríki heims vinni áfram að því að allir hafi tryggan aðgang að bóluefni gegn COVID-19, eins og forsætisráðherra lagði áherslu á í ávarpi sínu í dag.

Fjöldi þjóðarleiðtoga ávarpaði áheitaráðstefnuna sem Suga Yoshihide, forsætisráðherra Japans, boðaði til. Markmið ráðstefnunnar var að safna um tveimur milljörðum Bandaríkjadala og tryggja þannig nægilega fjármuni til að bólusetja hátt í þriðjung íbúa í lágtekjuríkjum.

Að meðtöldu 500 milljóna króna framlaginu sem forsætisráðherra tilkynnti í dag, hefur Ísland því nú varið rúmum milljarði króna til að tryggja þróunarríkjum aðgang að bóluefnum gegn COVID-19

COVAX er bóluefnastoð alþjóðlegs samstarfs til þess að flýta þróun, framleiðslu og jöfnum aðgangi að skimunarbúnaði, meðferðum og bóluefni gegn COVID-19. Framlag Íslands rennur til COVAX-AMC sem snýr að kaupum og dreifingu COVID-19 bóluefnaskammta fyrir þróunarlönd. Bólusetningarbandalagið Gavi hefur umsjón með þessum þætti samstarfsins.

Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.