Körfubolti

KR-ingar hafa unnið tíu af síðustu ellefu útileikjum sínum í úrslitakeppni

Óskar Ófeigur Jónsson skrifar
Brynjar Þór Björnsson og félagar í KR eru öflugir á útivöllum.
Brynjar Þór Björnsson og félagar í KR eru öflugir á útivöllum. Vísir/Bára

Úrslitastund í einvígi Vals og KR í átta liða úrslitum Domino's deildar karla í körfubolta er í kvöld en heimaliðið hefur enn ekki náð að fagna sigri í rimmunni.

Valur og KR hafa unnið tvo leiki hvort í einvígi sínu en allir sigrarnir hafa komið á útivelli. Vinni KR í kvöld verður þetta aðeins annað fimm leikja einvígið í sögunni þar sem allir leikir vinnast á útivelli. Hitt var þegar Snæfell sló KR út í undanúrslitunum 2010.

Það ætti nú að vera ágætar líkur á KR-sigri í kvöld enda hefur liðið verið frábær á útivelli. Ekki bara á þessu tímabili heldur einnig í úrslitakeppninni undanfarin ár.

KR-ingar hafa þannig unnið tíu af síðustu ellefu útileikjum sínum í úrslitakeppni. Báða leikina í þessari úrslitakeppni, fimm af sex útileikjum þegar þeir urðu Íslandsmeistarar 2019 og þrjá síðustu útileiki sína þegar KR-liðið vann Íslandsmeistaratitilinn vorið 2018.

Eina tap KR á útivelli síðan í miðju undanúrslitaeinvígi 2018 kom í Þorlákshöfn 9. apríl 2019 í öðrum leik í undanúrslitaeinvígi KR og Þórs. Þórsliðið vann þá 102-90 sigur þar sem Kinu Rochford var með 29 stig, 17 fráköst, 9 stoðsendingar og 50 framlagsstig.

Á sama tíma hafa KR-ingar aðeins unnið 6 af 11 heimaleikjum sínum þar af hafa þeir aðeins unnið einn af síðustu fimm leikjum í úrslitakeppni í DHL-höllinni.

Oddaleikur Vals og KR verður sýndur beint á Stöð 2 Sport og hefst útsendingin klukkan 19.50 eða strax á eftir beinni útsendingu frá oddaleik Stjörnunnar og Grindavíkur sem eru líka að spila hreinan úrslitaleik um sæti í undanúrslitunum.

Síðustu ellefu útileikir KR í úrslitakeppni

  • Undanúrslit 2018
  • 1 stigs sigur á Haukum (84-83)
  • Lokaúrslit 2018
  • 21 stigs sigur á Tindastól (75-54)
  • 2 stiga sigur á Tindastól (77-75)
  • Átta liða úrslit 2019
  • 1 stigs sigur á Keflavík (77-76)
  • 21 stigs sigur á Keflavík (85-64)
  • Undanúrslit 2019
  • 12 stiga tap fyrir Þór Þorl. (90-102)
  • 15 stiga sigur á Þór Þorl. (108-93)
  • Lokaúrslit 2019
  • 13 stiga sigur á ÍR (86-73)
  • 5 stiga sigur á ÍR (80-75)
  • Átta liða úrslit 2021
  • 1 stigs sigur á Val (99-98)
  • 12 stiga sigur á Val (115-103)
  • 10 sigrar í síðustu 11 útileikjum í úrslitakeppni

  • 6-5 á heimavelli á sama tímabili



Fleiri fréttir

Sjá meira


×