Á­forma hluta­fjár­út­boð og skráningu Ís­lands­banka í Kaup­höll

Þetta kemur fram á vef Íslandsbanka, en fyrirhugað útboð mun ná til þegar útgefinna hluta í Íslandsbanka. Útboðið og tímasetning þess er meðal annars háð markaðsaðstæðum, en að öllu óbreyttu gæti útboðið farið fram á öðrum ársfjórðungi 2021.

Íslandsbanki er að fullu í eigu íslenska ríkisins en Bankasýsla ríkisins fer með eignarhlut ríkisins í bankanum. Bankasýslan lagði fram tillögu til fjármála- og efnahagsráðherra í desember 2020 um að hefja sölumeðferð á eignarhlutum ríkisins í Íslandsbanka. Eftir meðferð í þinginu tók Bjarni Benediktsson fjármála- og efnahagsmálaráðherra ákvörðun í lok janúar um að hefja sölumeðferð og var Bankasýslunni falið að annast sölumeðferðina.

Um útboðið segir:

• Af hálfu Bankasýslu ríkisins, fyrir hönd ríkissjóðs (hér eftir „seljandi“), verða boðin til sölu þegar útgefin hlutabréf í Íslandsbanka.
• Útboðið fer fram annars vegar með almennu útboði á hlutabréfum til fagfjárfesta og almennra fjárfesta á Íslandi og lokuðu útboði til tiltekinna fagfjárfesta í ýmsum öðrum lögsögum.
• Stjórn bankans mun óska eftir því að allt hlutafé bankans verði tekið til viðskipta á skipulegum verðbréfamarkaði Nasdaq Iceland.
• Útboðið mun ná til að lágmarki 25% af útgefnu og útistandandi hlutafé bankans.
• Seljandi skuldbindur sig til að selja ekki frekari hlut í bankanum í 180 daga eftir fyrsta viðskiptadag hlutabréfanna á Nasdaq Iceland, með fyrirvara um ákveðnar undantekningar, sem eru í samræmi við viðteknar venjur á markaði.
• Citigroup Global Markets Europe AG, Íslandsbanki hf. og J.P. Morgan AG hafa sameiginlega umsjón með útboðinu og eru leiðandi söluráðgjafar ásamt Barclays Bank Ireland PLC, HSBC Continental Europe, Fossum mörkuðum hf. og Landsbankanum hf. Arion banki hf. og Kvika banki hf. ásamt Arctica Finance hf., Íslenskum fjárfestum hf. og Íslenskum verðbréfum hf. munu einnig hafa aðkomu að útboðinu sem söluráðgjafar.
• Útboðið er háð samþykki eftirlitsaðila og stjórnvalda.

Færust nær heilbrigðara umhverfi á fjármálamarkaði

Haft er eftir Bjarna að skráning Íslands­banka á markað sé mik­il­vægt skref í þá átt að draga úr um­tals­verðu eign­ar­haldi ís­lenska rík­is­ins á fjár­mála­markaði og muni veita rík­inu skýrt for­dæmi í þá átt að selja það sem eft­ir stend­ur af eign­arhlut í bank­an­um. „Með þess­um áfanga fær­umst við nær heil­brigðara um­hverfi á fjár­mála­markaði, eins og sjá má hjá ná­grönn­um okk­ar á Norður­lönd­um. Það er ánægju­legt að sjá að sölumeðferðin, sem stýrt er af Banka­sýslu rík­is­ins og ráðgjöf­um henn­ar, geng­ur vel og hlakka ég til að ljúka henni með góðum ár­angri.“

Tímamót

Hallgrímur Snorrason, stjórnarformaður Íslandsbanka, segir þetta vera tímamót í sögu Íslandsbanka þegar lagður verður grunnur að dreifðu og almennu eignarhaldi bankans, líkt og verið hefur lengst af í sögu hans. „Frá því að bankinn var endurreistur árið 2008 hefur hann starfað með þeim hætti sem skráð fyrirtæki gera. Innviðir bankans eru því vel þróaðir og uppfylla þær kröfur sem gerðar eru til skráðra fyrirtækja. Við erum ánægð að bjóða fjárfestum að taka þátt í áframhaldandi vegferð bankans og teljum að skráning á markað sé staðfesting á styrk hans og um leið íslenska bankakerfisins og íslenska hagkerfisins í heild sinni.“

Hagfelld og æskileg skilyrði fyrir hendi

Lárus Blöndal, stjórnarformaður Bankasýslunnar, segir að til samræmis við ákvörðun fjármála- og efnahagsráðherra og umsagnir efnahags- og viðskiptanefndar og fjárlaganefndar Alþingis, sé hann ánægður að sjá að áætlanir um almennt útboð Íslandsbanka séu að verða að veruleika. „Ráðherra fól Bankasýslu ríkisins ábyrgð og umsjón með söluferlinu og að tryggja ákveðna skilmála útboðs- og úthlutunarreglna. Í eigandastefnu ríkisins kemur fram að markmiðið sé að selja eignarhlut í Íslandsbanka þegar hagfelld og æskileg skilyrði eru til staðar og það er mat okkar að þau séu nú fyrir hendi.“