Daði býst ekki við því að fara á svið annað kvöld

Snemma í morgun fóru átta úr íslenska Eurovision-hópnum í Rotterdam í skimun fyrir kórónaveirunni, þar á meðal Daði og Gagnamagnið.

Niðurstöður úr skimuninni bárust í morgun og í ljós kom að einn meðlimur Gagnamagnsins reyndist smitaður.

Daði segir að upptaka frá annarri æfingu hópsins verði því notuð annað kvöld þegar Evrópu horfir á seinni undanriðilinn í beinni útsendingu. Sú upptaka verður einnig notuð í dómararennslinu í  kvöld.

„Við höfum öll farið mjög varlega alla ferðina og kemur þetta okkur gríðarlega á óvart. Við erum glöð með flutninginn á æfingunni og spennt fyrir því að allir fái að sjá. Takk fyrir allar ástarkveðjurnar.“