Karlmenn megi ekki útiloka að hafa farið yfir mörk á einhverjum tímapunktum. Þá sé ekki hægt að breyta fortíðinni. Hins vegar sé hægt að breyta til framtíðar.

Edda Falak, annar þáttastjórnenda hlaðvarpsins Eigin kvenna sem stóð að birtingu myndbandsins, tjáði Vísi í kvöld að sögur sem tengdust fólki í myndbandinu hefðu farið af stað í kjölfar birtinganna. 

Fyrir vikið hefði myndbandið tímabundið verið tekið úr birtingu.

Myndbandið muni birtast aftur

„Við erum að reyna að finna út hvað er best í stöðunni. En það breytir auðvitað ekki boðskapnum,“ segir Edda.

„Við ætlum að pósta því aftur. Hvort sem það verður án einhvers, eða einhver auka, eða bara eins.“

Gangi sögur um fólk í myndbandinu þurfi það fólk að axla ábyrgð.

Edda nefndi sjálf engin nöfn í samtali við Vísi. Tveir úr myndbandinu hafa í dag stigið fram og tjáð sig um málið. Fyrrnefndir Magnús og Pálmar.

Biðjast afsökunar

„Það er ljóst að ég ásamt öðrum þurfum að horfast í augu við það að hafa farið yfir mörk. Mér þykir það leitt og vil ég biðjast afsökunar,“ segir Magnús, sem starfar sem stafrænn ráðgjafi, í færslu á Instagram.

Honum finnist mikilvægt að sem flestir taki þátt í #metoo umræðunni vegna þess að kynferðisofbeldi hafi áhrif þvert á samfélagið. Hann trúi því að umræðan hafi fengið alla til að hugsa, hún hafi ekki orðið til án tilefnis og karlmenn, hann og aðrir, geti gert betur.

Magnús deilir færslu Pálmars á Instagram sem segist eiga fjölmargar vinkonur sem hafi verið beittar ofbeldi og líklega marga vini sem hafi beitt ofbeldi.

Stórt skref aftur á bak að fara í vörn

„Ég sjálfur hef mjög líklega farið yfir mörk kvenfólks í mínu lífi. Á því vil ég taka ábyrgð og biðjast afsökunar. Ég er ekki fullkominn þó ég kjósi að taka þátt í umræðunni. Það er mjög mikilvægt að það komi fram.“

Hann segir að karlmenn megi ekki útiloka að hafa farið yfir mörk á einhverjum tímapunktum.

„Ef við útilokum það og förum í vörn erum við að taka stórt skref aftur á bak í umræðunni,“ segir Pálmar sem starfar sem fyrirlesari og körfuboltaþjálfari.

Hann hafi brugðist góðri vinkonu þegar hann var yngri með því að taka ekki afstöðu. Í kjölfar umræðunnar í samfélaginu hafi hann reynt að bæta fyrir það.

„Við getum ekki breytt fortíðinni. En við getum breytt því hvernig við tökum ábyrgð á okkur sjálfum og vinum okkar í framtíðinni. Það er ástæðan fyrir því að ég tek þátt í dag.“

Fjölbreyttur hópur í myndbandinu

Auk Pálmars og Magnúsar vakti athygli að Áslaug Arna Sigurbjörnsdóttir, dómsmálaráðherra og systir Magnúsar, auk Víðis Reynissonar, yfirlögregluþjóns stigu fram í myndbandinu þolendum til stuðnings.

Ásamt þeim Eddu og Fjólu, þáttastjórnendum Eigin kvenna, komu fram í myndbandinu þau Kristófer Acox, Kristján Helgi Hafliðason, Saga Garðarsdóttir, Eva Mattadóttir, Sara Mansour, Álfgrímur Aðalsteinsson, Arnar Dan Kristjánsson, Donna Cruz, Erna Kristín Stefánsdóttir, Tinna Óðinsdóttir, Kolbrún Birna H. Bachmann, Helga Sigrún, Aron Can, Þorsteinn V. Einarsson og Kamilla Ívarsdóttir.