Viðskipti innlent

Gríðarleg hækkun álverðs bætir hag Landsvirkjunar

Kristján Már Unnarsson skrifar
Hörður Arnarson, forstjóri Landsvirkjunar: Raforkukerfið stefnir í að verða fullnýtt innan skamms.
Hörður Arnarson, forstjóri Landsvirkjunar: Raforkukerfið stefnir í að verða fullnýtt innan skamms. Sigurjón Ólason

Gríðarlegar verðhækkanir á málmum, bæði áli og kísli, stórbæta afkomu Landsvirkjunar en álverð hefur hækkað um áttatíu prósent á einu ári. Raforkukaupendur hafa samtímis aukið notkun sína og stefnir í að raforkukerfið verði fullnýtt.

Álverin þrjú á Íslandi, Ísal í Straumsvík, Norðurál á Grundartanga og Alcoa á Reyðarfirði, eru stærstu orkukaupendur landsins og afkoma þeirra hefur mikil áhrif á íslenskt efnahagslíf. Það er því sérlega áhugavert að sjá verðþróun áls á heimsmarkaði undanfarna tólf mánuði en um hana var fjallað í fréttum Stöðvar 2.

Í maímánuði í fyrra fór álverð niður undir 1.400 dollara á tonnið en hefur í þessum mánuði farið vel yfir 2.500 dollara. Hækkunin á einu ári er um áttatíu prósent.

Álverð er komið yfir 2.500 dollara tonnið og hefur ekki verið hærra í tíu ár.Grafík/Sigrún Hrefna Lýðsdóttir

Hjá Landsvirkjun sér forstjórinn fram á hærri tekjur fyrirtækisins en orkusamningar við Alcoa og Rio Tinto eru tengdir álverði.

„Þetta munar miklu. Þetta eru stórir samningar. Þetta eru tveir okkar stærstu samningar sem eru tengdir þessu. Og ef magnið eykst líka þá aukast tekjurnar,“ segir Hörður Arnarson.

„Svo er þriðji samningurinn, við Norðurál. Hann er tengdur raforkuverði í Evrópu og þar hafa verið mjög miklar hækkanir á raforkuverði, í öðrum löndum.“

Framleiðendur kísilmálms eru einnig stórir kaupendur íslenskrar raforku.

Kísilver PCC á Bakka við Húsavík hefur verið ræst á ný.Arnar Halldórsson

„Það er bæði uppi á Grundartanga og síðan á Bakka. Við höfum séð sömu verðþróun þar – að verð hafa verið að hækka og eftirspurn verið að aukast.

Það er mjög ánægjulegt líka að kísilverið á Bakka er tekið til starfa. Þeir stoppuðu alveg í þessari kreppu sem var í fyrra en eru núna komnir í gang.“

Og skyndilega er raforkan orðin eftirsóttari.

Háspennulína milli Búrfells og Sultartanga flytur raforku frá aflstöðvum Landsvirkjunar á Þjórsár- og Tungnaársvæðinu.Stöð 2/Arnar Halldórsson

„Í fyrra var ákveðin umræða um að það væri ónýtt raforka í raforkukerfinu. Það hefur breyst mjög hratt á þessu ári. Aðilar eru að kalla eftir fullnýtingu á samningum sínum og meira að segja nokkrir þeirra eru komnir umfram núverandi samninga sem þeir eru að nýta.

Og svo erum við að sjá líka í gagnaverunum, sem eru svona kvikari starfsemi, þar erum við að sjá mikinn vöxt.

Þannig að raforkukerfið er að verða mjög vel nýtt og stefnir í að verða fullnýtt innan skamms,“ segir forstjóri Landsvirkjunar.

Hér má sjá frétt Stöðvar 2:


Tengdar fréttir

Álverð rýkur upp og búið að hækka um 59 prósent

Heimsmarkaðsverð á áli hefur hækkað hratt á undanförnum vikum og fór í dag í 2.330 dollara tonnið. Það er 59 prósenta hækkun á ellefu mánuðum en um miðjan maí í fyrra fór verðið niður undir 1.460 dollara. Hækkunin frá því í byrjun febrúar nemur átján prósentum.

Landsvirkjun greiðir sex milljarða króna arð til ríkisins

Landsvirkjun mun greiða 6,34 milljarða króna arðgreiðslu til íslenska ríkisins fyrir árið 2020. Eigendur samþykktu tillögu stjórnar þess efnis á aðalfundi Landsvirkjunar sem haldinn var í dag. Arðurinn er ákvarðaður í Bandaríkjadölum og nemur hann 50 milljónum dala í ár.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×