Innlent

Mikil samstaða í sóttvarnaaðgerðum í Skagafirði

Heimir Már Pétursson skrifar
Katrín Jakobsdóttir forsætisráðherra var ein þeirra átta þúsund sem fengu bólusetningu í Laugardalshöll í dag. Hér er hún í fylgd Ragnheiðar Óskar Erlendsdóttur framkvæmdastjóra hjúkrunar hjá Heilsugæslunni á höfuðborgarsvæðinu.
Katrín Jakobsdóttir forsætisráðherra var ein þeirra átta þúsund sem fengu bólusetningu í Laugardalshöll í dag. Hér er hún í fylgd Ragnheiðar Óskar Erlendsdóttur framkvæmdastjóra hjúkrunar hjá Heilsugæslunni á höfuðborgarsvæðinu. Vísir/Vilhelm

Vonir standa til að hægt verði að aflétta viðbótar samkomutakmörkunum í Skagafirði strax eftir helgi. Þrír greindust smitaðir af kórónuveirunni innanlands í gær, þar af einn í sóttkví og var hann í Skagafirði. Forsætisráðherra var ein þeirra sem voru bólusettir í dag.

Einn greindist á landamærunum í gær og var hann með mótefni. Um tvö hundruð sýni voru tekin í Skagafirði í gær og greindist einn smitaður sem var í sóttkví og eru þá níu í einangrun í sveitarfélaginu. Á bilinu áttatíu til hundrað sýni voru tekin í dag og verður sýnatöku haldið áfram að minnsta kosti fram á föstudag.

Stefán Vagn Stefánsson yfirlögregluþjónn þakkar íbúum og fyrirtækjum í Skagafirði fyrir að hafa sýnt ábyrgð og samstöðu í þeim viðbótar sóttvarnaaðgerðum sem gripið hefur verið til í sveitarfélaginu.Stöð 2/Arnar

Stefán Vagn Stefánsson yfirlögregluþjónn í Skagafirði vonar að tekist hafi að ná utan um útbreiðsluna. Þannig að ekki þurfi að framlengja þær viðbótar sóttvarnaaðgerðir sem gilda í Skagafirði til og með sunnudags.

„Okkar vonir og væntingar ganga út frá því að við getum farið í afléttingar á mánudeginum. Að við förum þá í sams konar hömlur og höft og eru annars staðar,“ segir Stefán Vagn.

Íbúar og fyrirtæki hafi tekið aðgerðunum vel og sýnt ábyrgð og samstöðu.

„Það er náttúrlega lykillinn að því að hægt sé að kveða þetta niður svona hratt eins og við ættlum okkur og með þessum hætti. Að allir taki þátt og það hafa menn svo sannarlega gert hér,“ segir Stefán Vagn.

Forgangshópar væntanlega kláraðir í næstu viku

Í dag var bólusett með um átta þúsund skömmtum af Pfizer í Laugardalshöll og verður það eini bólusetningardagurinn í þessari viku að sögn Ragnheiðar Óskar Erlendsdóttur framkvæmdastjóra hjúkrunar hjá Heilsugæslunni. Það sé ekki er til meira efni til að gefa. Hins vegar verði nokkuð margir bólusettir í næstu viku.

Ragnheiður Ósk Erlendsdóttir segir um átta þúsund manns hafa verið bólusetta í Laugardalshöll í dag en alls fengu um tólf þúsund manns Pfizer bóluefnið á landinu í dag.Vísir/Vilhelm

„Þá verðum við með stóran Modernadag á mánudegi og svo aftur Pfizerdag á þriðjudeginum. Svo tökum við aftur upp þráðinn á fimmtudegi og verðum þá með Jansen eftir hádegi.“

Hvað verður mikið bólusett í næstu viku?

„Ætli það verði ekki svona tæp tuttugu þúsund í næstu viku,“ segir Ragneiður Ósk. En að auki verða fimm til sex þúsund bólusettir utan höfuðborgarsvæðisins.

Í dag og í næstu viku sé verið að klára að bólusetja forgangshópa og fólk með undirliggjandi sjúkdóma. Ekki verði byrjað að boða fólk eftir slembiúrtaki fyrr en í næstu eða þarnæstu viku þegar búið verði að klára þessa hópa.

Forsætisráðherra ekki vel við sprautur

Forsætisráðherra tók á honum stóra sínum í bólusetningunni í dag en hún viðurkenndi að henni væri ekki vel við sprautur. Hún ítrekaði þó þakklæti sitt fyrir að fá bólusetningua við covid 19 og þakkaði öllum þeim sem koma að bólusetningum landsmanna.Vísir/Vilhelm

Katrín Jakobsdóttir forsætisráðherra var ein þeirra átta þúsund sem fengu boðun í Laugardalshöll í dag.

Hvernig er staðan í ríkisstjórninni hvað bólusetningar varðar?

„Þau sem eru eldri eru búin að fá. Þannig að hálf ríkisstjórin er væntanlega komin með fyrri sprautu,“ sagði Katrín. Þau yngri hljóti svo að fara að detta inn.

Katrín var þakklát fyrir sprautuna og þakkaði þeim fjölmörgu sem standa að bólusetningunum og dáðist að skipulaginu. En hún á sjálf dálítið erfitt með að láta sprauta sig.

„Já ég hef verið hrædd við sprautur frá fyrstu sprautunni sem ég fékk. Þannig að ég er búin að kvíða dálítið fyrir þessu. Ég að sjálfsögðu mæti hér í bólusetningu. En þetta er svolítið eins og að fara til tannlæknis. Það er bara þannig,“ sagði Katrín dálítið stressuð.

Þegar röðin var síðan komin að henni sagði hún við hjúkrunarfræðinginn: „Ég er sko skíthrædd við sprautur.“

„Já, þá skaltu bara anda djúpt, anda rólega,“ sagði hjúkrunarfræðingurinn yfirveguð um leið og hún bólusetti forsætisráðherra sem síðan undraðist hafa ekki fundið fyrir stungunni.

Jæja, þetta var ekki svo erfitt?

„Þá er vinstri hliðin orðin bólusett. Ég verð að fá hægri hliðina næst,“ sagði Katrín fegin.

Er það ekki gott fyrir kosiningar?

„Jú, mjög gott.“

Bólusett réttum megin?

„Já ég er bólusett réttum megin. Ég tek það fram,“ sagði Katrín Jakobsdóttir létt í bragði.


Tengdar fréttir

Ís­land komið á græna listann hjá Bret­landi

Ísland er loks komið á græna listann hjá Bretlandi, það er að Bretar mega ferðast til Íslands sér til skemmtunar. Mánuðum saman hafa Bretar ekki mátt ferðast til ýmissa ríkja sér til skemmtunar en það bann virðist vera að enda komið.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.