Ríkisstjórnin héldi velli og Sósíalistar næðu inn

Snorri Másson skrifar 3. maí 2021 23:46

Meirihlutann á Alþingi mynda 33 þingmenn þriggja ríkisstjórnarflokka. Ef gengið yrði til kosninga í dag væru fulltrúar þessara flokka á Alþingi jafnmargir og þeir voru í kosningunum 2017. Vísir/Vilhelm

Vinstri hreyfingin - grænt framboð bætir við sig 2% prósentustigum í nýjasta Þjóðarpúlsi Gallup og mælist með 14,3% fylgi ef gengið yrði til kosninga í dag. Í kosningunum 2017 fékk flokkurinn 16,9% fylgi.

Miðflokkurinn dalar frá síðustu könnun og mælist með 8,2% fylgi, samanborið við 10,9% fylgi í síðustu kosningum. Flokkurinn hefur þó fengið tvo þingmenn til liðs við sig á kjörtímabilinu sem áður voru í Flokki fólksins.

Stærsti flokkur á Alþingi er Sjálfstæðisflokkurinn með 23,8% fylgi en hann hlaut um 25% fylgi í síðustu þingkosningum. Samanlagt fengju Vinstri grænir, Sjálfstæðisflokkur og Framsókn 33 þingmenn, sem er sami fjöldi og myndar meirihlutann nú.

Sósíalistaflokkurinn mælist með þrjá þingmenn inni í krafti 5% fylgis. Sá flokkur hefur enn ekki kynnt framboðslista. Flokkur fólksins mælist ekki með þingmann inni, eftir að hafa verið með fjóra inni í síðustu kosningum.

Viðreisn fengi tæp 10 prósent en Framsóknarflokkurinn rúm 10%.

Alþingiskosningar 2021 Ríkisstjórn Katrínar Jakobsdóttur Sósíalistaflokkurinn Sjálfstæðisflokkurinn Skoðanakannanir

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.