Jónatan: Það var enginn leikmaður KA á deginum sínum í dag

„Við komum mjög illa inn í leikinn og gerðum okkur mjög erfitt fyrir. Það sem við lögðum upp með fyrir leik gekk engan veginn upp, við náðum ekki að hreyfa vörn Hauka líkt og við vildum og vorum við ekki góðir í dag," sagði Jónatan Magnússon þjálfari KA eftir leik.

Byrjun KA var afleidd á mörgum sviðum, ofan á það að skora lítið sem ekkert af mörkum, varði Nicholas Satchwell sinn fyrsta bolta þegar tæplega 20 mínútur voru liðnar af leiknum.

„Við fengum ekki góða markvörslu í dag, sem má líka skrifa á vörnina þar sem við vorum langt frá þeim og þeir fengu auðveld skot, heildar skipulag liðsins var lélegt í dag sama hvar er litið," sagði Jónatan sem var ánægður með að leikurinn fór ekki ver en hann gerði.

„Ég sagði fyrir leik að Haukar eru þannig liðið að það þurfa allir að vera á deginum sínum hefðum við ætlað að vinna þá, liðið svaraði þver öfugt við það og gáfu lítið sem ekkert framlag." 

KA liðið fer í tveggja vikna pásu þar sem þeir fengu undanþágu að leika ekki í landsleikjahlénu líkt og önnur lið. Jónatan sagði að þó liðið sé ekki í neinni krísu þá er nóg sem þarf að laga.