Barði fórnarlamb sitt í lærið með kylfu

Elín Margrét Böðvarsdóttir skrifar 22. apríl 2021 07:52

Lögreglan sinnti ýmsum verkefnum í gærkvöldi og í nótt. Vísir/Vilhelm

Tilkynnt var um líkamsárás á Granda um klukkan átta í gærkvöldi þar sem árásarmaður hafði lamið fórnarlamb sitt með kylfu í lærið og flúið af vettvangi. Árásarþoli gat ekki stigið í fótinn og var fluttur á bráðamóttöku með sjúkrabíl að því er segir í dagbók lögreglunnar á höfuðborgarsvæðinu. Árásarmaðurinn fannst um þremur tímum síðar og var handtekinn og vistaður í fangageymslu í þágu rannsóknar málsins.

Þá hafði lögregla afskipti af manni um níu leytið í gærkvöldi en sá var með „hendurnar fullar af verkfærum,“ líkt og það er orðað í tilkynningu lögreglu. Viðurkenndi maðurinn strax að hafa stolið verkfærunum en um var að ræða rafmagnsverkfæri í töskum. Maðurinn sýndi lögreglunni bifreið sem hann hafði stolið verkfærunum úr en var handtekinn og vistaður í fangageymslu um stund en var síðan látinn laus úr haldi að lokinni skýrslutöku. Eigandi verkfæranna ku hafa sótt eignir sínar á lögreglustöð.

Vitnað er einnig til mótmæla við rússneska sendiráðið í gærkvöldi þar sem um 28 mótmælendur voru saman komnir en allt fór vel fram að því er segir í dagbókinni.

Einn ökumaður var stöðvaður í Ártúnsbrekku eftir að hafa mælst á 127 kílómetra hraða þar sem hámarkshraði er 60. Sér til varnar sagðist ökumaðurinn vera að verða of seinn í matinn. Þá hafði lögreglan á höfuðborgarsvæðinu afskipti af þó nokkrum fjölda ökumanna vegna gruns um ölvunar- eða fíkniefnaakstur eða akstur án ökuréttinda.

Lögreglumál Reykjavík

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.