Innlent

Í fangelsi fyrir að skjóta að mönnum út um glugga

Kjartan Kjartansson skrifar
Maðurinn á langan sakaferil að baki og var því ekki talið unnt að skilorðsbinda fangelsisdóminn sem hann hlaut.
Maðurinn á langan sakaferil að baki og var því ekki talið unnt að skilorðsbinda fangelsisdóminn sem hann hlaut. Vísir/Vilhelm

Karlmaður á fimmtugsaldri var dæmdur í níu mánaða fangelsi fyrir að hafa skotið af skammbyssu og ógnað fólki í Súðarvogi fyrir tveimur árum. Hann var einnig dæmdur fyrir vörslu á fíkniefnum og ólöglegum vopnum og skotfærum.

Atvikið átti sér stað í Súðarvogi í Reykjavík að morgni 9. mars árið 2019. Lögregla var þá kölluð til vegna skothvella. Maðurinn var einn fjögurra sem voru handteknir á vettvangi. Hann var úrskurðaður í gæsluvarðhald í kjölfarið.

Héraðssaksóknari ákærði manninn fyrir hættubrot og vopnalagabrot fyrir að hafa hleypt fjórum skotum úr Ruger-skammbyssu út um glugga og beint henni að tveimur mönnum sem leituðu skjóls á bílastæði fyrir utan heimili hans.

Hann var einnig dæmdur fyrir mál frá árinu áður þegar töluvert magn af fíkniefnum og lyfjum fundust í fórum hans. Lagt var hald á afmetamín, kókaín, e-töflur og stera auk íblöndunarefna. Var hann ákærður fyrir fíkniefna- og lyfjabrot. Þá var maðurinn ákærður fyrir vopnalagabrot vegna afsagaðrar haglabyssu og skammbyssu auk skotfæra sem hann hafði í vörslu sinni án heimildar.

Maðurinn játaði á sig vörslu fíkniefnanna og lyfjanna en neitaði því að þau hafi verið ætluð til sölu og drefingar. Gekkst hann einnig við því að hafa átt vopnin. Hann játaði að hafa skotið af byssunni en neitaði því að hafa ætlað að valda neinum skaða.

Fjórir handteknir eftir að skotum var hleypt af í Vogahverfi - Vísir (visir.is)

Sagðist hafa ætlað að fæla mennina burt

Í dómi Héraðsdóms Reykjavíkur kemur fram að við rannsókn málsins fundust patrónur úr skothylkjum á svalagólfi íbúðar mannsins. Þá voru greinileg ummerki um að skotið hefði verið á BMW-jeppabifreið fyrir framan húsið og mögulega á fleiri bifreiðar.

Á upptöku öryggismyndavélar mátti sjá tvo menn koma inn á bifreiðastæði í porti fyrir framan íbúð mannsins. Þeir hafi virst kasta einhverju að eða í húsið, látið „dólgslega“ og sparkað í bifreiðar á stæðinu. Skömmu síðar sáust þeir leita skjóls. Við skýrslutöku sögðust mennirnir tveir hafa hraðað sér burtu þegar þeir heyrðu byssuhvelli.

Maðurinn sem var dæmdur fyrir að hafa skotið á þá bar því við að mennirnir tveir hefðu haft í hótunum við sig fyrir atburðina. Hann hefði haft af því spurnir að eitthvað „slæmt væri í uppsiglingu“. Hann hafi leitað til lögreglu en litlar undirtektir fengið. Lýsti hann því meðal annars að árinu áður hefði verið kveikt í heima hjá honum þegar eldsprengju var kastað inn til hans.

Tveggja manna leitað vegna bensínsprengju í Súðavogi - Vísir (visir.is)

Þegar unnusta hans hafi sagt honum frá því að mennirnir tveir væru fyrir utan hefði hann skotið með byssu út um gluggann en þvertók fyrir að hafa miðað henni að þeim. Hann hafi alls ekki ætla að valda neinum skaða heldur aðeins fæla mennina burt.

Byssuna hefði hann keypt vegna brunans árinu áður „ef eitthvað skyldi út af bregða“. Hana hafi hann ætlað að nota til að verja sig og fjölskyldu sína án þess að nokkur ætti að slasast.

Efnin sögð til eigin nota

Ákæra lögreglustjóra höfuðborgarsvæðisins vegna fíkniefnanna og skotvopnanna kom til eftir að maðurinn var handtekinn í maí árið 2018. Þá hafði verið tilkynnt um að einhver hefði skotið á mann úr bifreið í Kópavogi. Bárust böndin fljótt að ákærða.

Við húsleit á heimili hans var lagt hald á skotvopnin, skotfærin, fíkniefnin og lyfin. Bar maðurinn því við að efnin væru til eigin nota.

Úr­skurðaður í gæslu­varð­hald eftir að hafa hleypt úr byssu - Vísir (visir.is)

Óskilorðsbundinn dómur vegna langs sakaferils

Héraðsdómur taldi aðeins sannað að maðurinn hefði aðeins beint byssunni að mönnunum þegar hann hleypti einu skoti af fjórum af. Hann var sakfelldur fyrir hættubrot vegna þess og sömuleiðis vopnalagabrot. Hann var einnig dæmdur fyrir vörsluna á efnunum og vopnunum árið 2018. Skýringar hans um að efnin hafi verið ætluð til einkaneyslu voru ekki taldar trúanlegar.

Litið var til sakaferils mannsins þegar refsing hans var ákvörðuð. Í dómnum kemur fram að hann hafi átta sinnum gerst brotlegur við refsilög frá 1994, þar á meðal í átján mánaða fangelsi fyrir ólögmæta nauðung, hótanir og tilraun til fjárkúgunar með dómi Hæstaréttar árið 2011.

Maðurinn var einn af fimmtán mönnum sem dæmdir voru í stóra fíkniefnamálinu árið 2000, sem var eitt umfangsmesta mál sem komið hafði upp þá. Hann var þá dæmdur í tveggja ára og sex mánaða fangelsi fyrir að hafa staðið að kaupum á 660 grömmum af kókaíni í Bandaríkjunum og flutt í varahlut til landsins.

Endurtekin fíkniefna- og vopnalagabrot mannsins voru virt honum til refsiþyngingar og hættustig og grófleiki hættubrotsins sem hann var sakfelldur fyrir nú sömuleiðis. Honum var talið til málsbóta að hafa játað sök að nokkru leyti og hafa greint hreinskilnislega frá atvikum eins og þau horfðu við honum. Þá var litið tafa á meðferð málsins.

Var refsing mannsins ákvörðuð hæfileg níu mánaða fangelsisvist en hún var ekki skilorðsbundin vegna sakaferils hans. Frá dómnum dregst gæsluvarðhald sem hann sætti frá 9.-27. mars 2019.

Skammbyssa mannsins, afsöguð haglabyssa, hvellvissa, skotfæri og efnin voru öll gerð upptæk. Maðurinn þarf að greiða hátt í tvær og hálfa milljón krónur í málsvarnarlaun og annan sakarkostnað.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.