Í hlaðvarpsþættinum The Mike Show í gær ýjaði Guðjón að ósætti Gylfa og Eiðs Smára, aðstoðarþjálfara íslenska landsliðsins, hefðu verið ástæða þess að Gylfi gaf ekki kost á sér í leikina í undankeppni HM í þessum mánuði.
„Ég kannast ekki við ósætti milli mín og Eiðs Smára, nema þá að Guðjón Þórðarson viti eitthvað meira en ég,“ sagði Gylfi við 433.is í dag.
„Þetta er bara kjánalegt að fyrrum landsliðsþjálfari og fyrrum þjálfari minn sé að segja þetta í einhverju viðtali, ég veit ekki alveg hvaðan þetta kemur,“ sagði Gylfi sem lék undir stjórn Guðjóns hjá Crewe Alexandra 2009.
Hann segir ekkert hæft í þeim sögusögnum að þeim Eiði Smára komi ekki vel saman.
„Það voru einhverjir sem spurðu mig út í þetta í gærkvöldi en venjulega myndi ég ekki svara svona. Mér líkar mjög vel við Eið Smára og vildi því hreinlega klára þetta mál strax,“ sagði Gylfi.
Gylfi og Alexandra Helga Ívarsdóttir, eiginkona hans, eiga von á sínu fyrsta barni og vill Gylfi ekki missa af fæðingunni.
„Það er því miður eina ástæðan þrátt fyrir að einhverjum hafi kannski þótt hitt vera skemmtileg saga,“ sagði Gylfi sem hefur ekki séð neina ástæðu til að ræða málið við Eið Smára.
„Nei, nei, ég hef ekki talað við hann. Ég þarf ekkert að tala við hann, þetta er svo langt frá því að vera satt að maður varla nennir að svara fyrir þetta núna,“ sagði Gylfi en viðtalið má lesa hér.
Íslendingar eru án stiga eftir fyrstu tvo leiki sína í undankeppni HM. Ísland mætir Liechtenstein í Vaduz á miðvikudagskvöldið.
