Innlent

Hjúkrunarheimili, baráttan um miðjuna og kynferðisofbeldi í Víglínunni

Heimir Már Pétursson skrifar
Í Víglínunni á Stöð 2 klukkan 17:35 verður rætt við Svandísi Svavarsdóttur, Þorgerði Katrínu Gunnarsdóttur, Þórunni Sveinbjarnardóttur, Steinunni Gyðu og Guðjónsdóttur og Jón Steinar Gunnlaugsson.
Í Víglínunni á Stöð 2 klukkan 17:35 verður rætt við Svandísi Svavarsdóttur, Þorgerði Katrínu Gunnarsdóttur, Þórunni Sveinbjarnardóttur, Steinunni Gyðu og Guðjónsdóttur og Jón Steinar Gunnlaugsson. Stöð 2/Einar

Í vikunni gagnrýndu Vestmannaeyjabær og Fjarðabyggð hvernig heilbrigðisyfirvöld ætla að standa að yfirtöku hjúkrunarheimila í bæjarfélögunum eftir að þau ákváðu að hætta rekstri þeirra sjálf.

Bæjarfélögin segja heilbrigðisráðuneytið þvinga fram uppsagnir alls starfsfólks hjúkrunarheimilanna án þess að tryggt væri að það héldi störfunum eftir að heilbrigðisstofnanir ríkisins taka reksturinn yfir. Uppsagnir áttu að taka gildi um næstu mánaðamót en sveitarfélögin hafa frestað þeim um mánuð í von um að lausn finnist.

Svandís Svavarsdóttir heilbrigðisráðherra vonar að farsæl lausn finnst á framkvæmd yfirtöku ríkisins á rekstri hjúkrunarheimila í Vestmannaeyjum og Fjarðabyggð.Stöð 2/Einar

Svandís Svavarsdóttir heilbrigðisráðherra hefur sagt margar rangfærslur í málflutningi Vestmannaeyjabæjar og Fjarðabyggðar. Verið sé að framfylgja lögum við yfirtökuna og bæjarfélögin hljóti að hafa gert sér grein fyrir að yfirtakan hefði uppsagnir starfsfólks í för með sér og síðan yrðu störfin auglýst laus til umsóknar. Heimir Már Pétursson fréttamaður fær heilbrigðisráðherra til að ræða þessi mál í Víglínunni á Stöð 2 í dag.

Uppstillingarnefnd Samfylkingarinnar í suðvesturkjördæmi, Kraganum, ákvað í vikunni að skáka Guðmundi Andra Thorssyni alþingismanni og oddvita flokksins í kjördæminu úr forystusætinu í annað sætið. Þórunn Sveinbjarnardóttir formaður BHM og fyrrverandi þingmaður flokksins og umhverfisráðherra var skipuð í fyrsta sætið og kæmi því aftur inn á þing eftir tíu ára hlé nái hún kjöri.

Þorgerður Katrín Gunnarsdóttir formaður Viðreisnar mun að öllum líkindum leiða lista flokksins í suðvesturkjördæmi og Þórunn Sveinbjarnardóttir oddviti Samfylkingarinnar í kjördæminu segja málefnin ráða myndun næstu ríkisstjórnar. Formaður Samfylkingarinnar hefur hins vegar útilokað samstarf við Sjálfstæðisflokkinn.

Þórunn mætir í Víglínuna ásamt Þorgerði Katrínu Gunnarsdóttur formanni Viðreisnar samráðherra hennar í ríkisstjórn Samfylkingar og Sjálfstæðisflokks undir forsæti Geirs H. Haarde. Í kosningunum í lok september munu þær takast á um hilli kjósenda vinstri og hægra megin við miðju stjórnmálanna en áherslur þessarra flokka eru um margt líkar.

Jón Steinar Gunnlaugsson er sammála talskonu Stígamóta um alvarleika kynferðisafbrota. Hins vegar megi ekki gilda aðrar reglur um sönnunarbyrði í þeim málum en öðrum.Stöð 2/Einar

Mikil óánægjualda braust út meðal samtaka kvenna í þjóðfélaginu þegar upplýst var að dómsmálaráðherra hefði ákveðið að ráða Jón Steinar Gunnlaugsson hæstaréttarlögmann og fyrrverandi hæstaréttardómara í tímabundið verkefni til að vinna að tillögum um styttingu málsmeðferðartíma í refsivörslukerfinu.

Um svipað leyti kynntu Stígamót kæru níu kvenna á íslenska ríkinu til Mannréttindadómstóls Evrópu vegna þess að kynferðis- og heimilisofbeldismál þeirra hefðu verið felld niður.

Steinunn Gyðu og Guðjónsdóttir talskona Stígamóta segir að þrátt fyrir að sönnunargögn eins og símaskilaboð frá geranda hafi legið fyrir í málum níu kvenna sem kærð hafa verið til Mannréttindadómstólsins, haf þeirra mál ekki náð að komast fyrir dómstóla.Stöð 2/Einar

Steinunn Gyðu og Guðjónsdóttir talskona Stígamóta og Jón Steinar Gunnlaugsson sem ákvað á föstudag að segja sig frá verkefninu mæta í Víglínuna til að ræða þessi mál. Jón Steinar hefur áður verið gagnrýndur fyrir málflutning sinn um sönnunarbyrði í kynferðisbrotamálum þar sem hann hefur meðal annars sagt að ekki sé hægt að snúa sönnunarbyrði í þeim málum við. Stígamót hafa síðan haldið því fram að ekki sé hlustað á sjónarmið kvenna í kynferðir- og heimilisofbeldismálum.

Víglínan er á dagskrá Stöðvar 2 klukkan 17:35 og fer inn á Stöð 2+ að útsendingu lokinni.


Tengdar fréttir

Segja yfirvöld þvinga fram uppsagnir á annað hundrað manns

Bæjaryfirvöld í Vestmannaeyjum og Fjarðabyggð segja heilbrigðisráðuneytið ætla að þvinga bæjarfélögin til að segja upp á annað hundrað starfsmönnum hjúkrunarheimila frá næstu mánaðmótum. Yfirvöld hafi sýnt stöðu hjúkrunarheimilanna algert tómlæti.

Jón Steinar segir sig frá verkefninu

Jón Steinar Gunnlaugsson fyrrverandi hæstaréttardómari óskaði í morgun eftir því að vera leystur frá verkefni sem dómsmálaráðherra fól honum að vinna fyrir ráðuneytið.  Jón Steinar segir í yfirlýsingu að í ljósi gagnrýni á ráðninguna telji hann að þátttaka sín hefði spillt framgangi verkefnisins.

Níu konur kæra íslenska ríkið

Níu íslenskar konur hafa ákveðið að kæra íslenska ríkið til Mannréttindadómsstóls Evrópu vegna þeirrar niðurstöðu að fella niður mál þeirra sem þær höfðu kært til lögreglu en um er að ræða kynferðisbrot og heimilisofbeldi.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×