Jón Steinar segir sig frá verkefninu

Áslaug Arna Sigurbjörnsdóttir dómsmálaráðherra greinir frá þessu í færslu á Facebook nú á þriðja tímanum. Þar kemur fram að Hörður Felix Harðarson hæstaréttarlögmaður hafi tekið að sér verkefnið í stað Jóns Steinars. 

„Jón Steinar Gunnlaugsson, fv. hæstaréttardómari, óskaði í morgun eftir því að vera leystur frá verkefninu og hef ég fallist á þá beiðni,“ segir Áslaug Arna.

Umrætt verkefni felst í því að vinna að tillögum um mögulega styttingu á málsmeðferðartíma sakamála á rannsóknar- og dómstig. Áslaug segir í færslu sinni að tildrög verkefnisins hafi verið „síendurteknar fréttir af löngum málsmeðferðartíma efnahagsbrota, einkum í svonefndum hrunmálum.“ Það sé hagur allra að rannsókn og meðferð mála fyrir dómstólum taki ekki of langan tíma.

„Hörður Felix mun á meðan verkefninu stendur kalla sérfróða aðila að borðinu, fólk með reynslu og þekkingu sem verjendur í sakamálum til að leggja sín lóð á vogarskálarnar um þetta mikilvæga efni. Ég tel mikilvægt að hlusta á ólík sjónarmið í þessu efni, meðal annars frá þeim sem starfa ekki innan kerfisins. Afraksturinn verður tekinn til skoðunar og í framhaldinu kallað eftir sjónarmiðum fleiri aðila, t.d réttarfarsnefndar.“

Telur að þátttaka sín myndi spilla framgangi verkefnisins

Jón Steinar segir í yfirlýsingu til fréttastofu vegna málsins nú á þriðja tímanum að fjöldi fólks hafi gagnrýnt ráðningu hans á „á frekar ógeðfelldum forsendum sem í raun koma verkefninu ekkert við.“

„Allt að einu tel ég að það muni spilla fyrir framgangi verkefnisins og úrbótum sem ég kann að vilja leggja til ef ég held áfram þessu starfi. Ég hef því ákveðið að óska þess við ráðherrann að hann leysi mig frá verkefninu. Hefur ráðherrann fallist á það,“ segir Jón Steinar.

Ráðning Jóns Steinars vakti hörð viðbrögð nú í vikunni. Nokkur félög á borð við Stígamót, Femínistafélag Háskóla Íslands, Uppreisn og fleiri stigu fram og sögðu útspilið kaldar kveðjur til kvenna. Þá voru þingkonur á meðal gagnrýnenda.

Gagnrýnin sneri í grófum dráttum að því að ráðningin væri ekki til þess fallin að auka tiltrú þolenda á réttarkerfinu. Rifjuð voru upp ýmis ummæli Jóns Steinars sem ekki þóttu „þolendavæn“, til að mynda ummæli á borð við að þolendum kynferðisbrota myndi líða miklu betur ef þeim tækist að þróa með sér fyrirgefningu.

Fréttin var uppfærð klukkan 14:51 með yfirlýsingu Jóns Steinars.