Erlent

Drottningin döpur yfir erfiðleikum Meghan og Harrys

Heimir Már Pétursson skrifar

Elísabet Englandsdrottning segir alla konungsfjölskylduna dapra eftir að hafa komist að því til fulls í viðtali Opruh Winfrey við Harry og Meghan hversu erfið síðustu ár hafi reynst þeim. Almenningsálitið í Bretlandi virðist vera á sveif Meghan.

Drottningin segir í yfirlýsingu nú síðdegis að þau mál sem hafi verið til umræðu í viðtali Opruh Winfrey við Harry og Meghan, sérstaklega varðandi kynþáttamál, séu umhugsunarefni. Þótt minni fólks geti verið mismunandi séu þessi mál tekin mjög alvarlega og verði tekin fyrir hjá fjölskyldunni. Harry, Meghan og sonur þeirra Archie verði alltaf elskulegir meðlimir fjölskyldunnar.

Í viðtalinu við Opruh vildi Harry ekki upplýsa hvaða meðlimur fjölskyldunnar lýsti áhyggjum af húðlit sonarins áður en hann fæddist.

„Á þessum tíma var þetta mjög undarlegt, mér var dálítið brugðið,“ sagði Harry við Opruh.

„Mér líður ekki vel með það (að upplýsa hver átti ummælin). En þetta gerðist strax í upphafi,“ sagði Harry.

Harry Bretaprins og Meghan Markle.EPA-EFE/NEIL HALL

Jane Owen útgefandi og almannatengslaráðgjafi hrósar hertogahjónunum og þá sérstaklega Meghan fyrir framgöngu þeirra í viðtalinu. Konungsfjölskyldan sé hins vegar í vanda.

„Þetta er sennilega versta staða fjölskyldunnar í fjölmiðlum í mjög langan tíma,“ segir Owen. Hafi hún eitthvað lært af reynslunni ætti fjölskyldan að koma hreint fram.

Meghan sagði suma í fjölskyldunni hafa sagt að þau hefðu öll þurft að mæta og eiga við ókurteisa fjölmiðla. „En dónaskapur og kynþáttafordómar eru ekki það sama. Þau hafa líka átt að teymi sem bregst formlega við og ver þau. Sérstaklega þegar vitað er að eitthvað er ekki sannleikanum samkvæmt. Við höfðum engan slíkan stuðning,“ sagði Meghan.

Fólk sem fjölmiðlar hafa rætt við á förnum vegi í Lundúnum sýnir flest Meghan stuðning sinn þótt sumir gagnrýni hana og Harry. Þau njóta mikils stuðnings í Brixton hverfinu í Lundúnum þar sem íbúar eru margir af afrískum uppruna.

Alnafni Harold Wilson fyrrverandi forsætisráðherra breska Verkamannaflokksins segir að konungsfjölskyldan hefði getað litið að komu Meghan í fjölskylduna sem tækifæri til að miða áfram með tíðarandanum.

„En konungsfjölskyldan er ekki þannig,“ segir Wilson. „Þetta ristir mjög djúpt þannig að jafnvel áður en barnið kom í heiminn hafa þau áhyggjur af litarhafti þess. Það segir manni allt um þau,“ sagði Harold Wilson augljóslega hneykslaður.

Mikill órói er sagður innan konungsfjölskyldunnar um þessar mundir.EPA/STR

Sumir hafa jafnvel lýst áhyggjum af framtíð samveldisins vegna þessa, þar sem mörg afríkuríki eru meðal þeirra. Rebecca Wangare íbúi í Næróbí í Kenýa segir Meghan vera sterka konu 21. aldarinnar. „Með aðstoð eiginmannsins hefur hún ákveðið að yfirgefa konungsfjölskylduna, stóru nöfnin, fjölskyldunnar sinnar vegna. Þau sem eru í hjónabandi með hvítum líta upp til hennar sem fyrirmyndar,“ segir Wangare.

Jacinda Ardern forsætisráðherra segir framtíð stjórnarskrár Nýjasjálands ekki ráðast af einu viðtali við Harry og Meghan.

„Þegar sú umræða kemur upp hjá íbúum landsins snýst hún um hvað er best fyrir landið fremur en nokkuð annað,“ sagði Ardern við spurula fjölmiðla í dag.

Meghan hefur ekki verið í sambandi við föður sinn Thomas Markle allt frá því hann lét fjölmiðla fá hluta af bréfi hennar til hans rétt fyrir brúðkaup hennar og Harrys. Í bréfinu reyndi hún að fá föður sinn til að hætta að ræða hennar mál við fjölmiðla.

Markle segir Meghan hafa snúið baki við bæði móður- og föðurfjölskyldu sinni. Hann telji hvorki konungsfjölskylduna né Breta almennt haldna kynþáttafordómum. Fordómarnir séu meiri í Los Angeles í Kaliforníu.

„Þetta varðandi húðlit barnsins. Ég giska og vona að það hafi bara verið heimskuleg spurning frá einhverjum,“ segir Markle. Hertogahjónin hafi skotið yfir markið í viðtalinu við Ophru.

„Þau hefðu átt að bíða með tilliti til aldurs drottningarinnar og Filipusar. Þau hefðu að minnsta kosti átt að reyna að bíða með þetta,“ segir Markle.

Karl Bretaprins faðir Harrys heimsótti bólusetningarmiðstöð í Lundúnum í dag. Þegar hann var að yfirgefa miðstöðina kallaði fréttmaður til hans spurningu um hvað honum þætti um viðtalið. Prinsinn leiddi spurninguna hins vegar alveg hjá sér og hélt leiðar sinnar.


Tengdar fréttir

Drottningin tjáir sig um viðtalið

Elísabet Bretadrottning segir alla bresku konungsfjölskylduna sorgmædda yfir því hvað síðustu ár hafi verið erfið fyrir Meghan Markle og Harry Bretaprins. 

Piers Morgan móðgaðist og strunsaði út úr stúdíóinu

Piers Morgan, einn þáttastjórnanda Good Morning Britain á ITV-sjónvarpsstöðinni, strunsaði út úr myndverinu í beinni útsendingu í morgun í kjölfar umræðu um hið margumtalaða viðtal Opruh Winfrey við Meghan Markle og Harry Bretaprins.

Krísu­fundir hjá konungs­fjöl­skyldunni vegna viðtalsins

Breska konungsfjölskyldan hefur haldið krísufundi í kjölfar viðtals Opruh Winfrey við hertogahjónin af Sussex, þau Meghan Markle og Harry Bretaprins. Viðtalið var frumsýnt á CBS-sjónvarpsstöðinni á sunnudagskvöld en sýnt í Bretlandi í heild sinni í gærkvöldi.

Hvorki Elísabet né Filippus ræddu húðlit Archie

Viðtal Opruh Winfrey við Meghan Markle, hertogaynju af Sussex, og Harry Bretaprins hefur verið eitt stærsta fréttamálið í dag beggja vegna Atlantshafsins. Hjónin fóru yfir síðustu ár, allt frá því að Meghan kom inn í konungsfjölskylduna og þar til að þau ákváðu í sameiningu að segja skilið við hana á síðasta ári.

Meghan Markle: „Ég vildi ekki lifa lengur“

Meghan Markle, hertogaynjan af Sussex, segir að breska konungsfjölskyldan hafi skapað svo rasískt andrúmsloft að hún hafi á tímabili verið í sjálfsvígshugleiðingum á meðan hún gekk með fyrsta barn og sitt og Harrys Bretaprins, Archie.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.