Innlent

Lof­orð fram­kvæmda­stjórans í fjöl­miðlum kom milljóna­skuldinni yfir á fleiri

Kristín Ólafsdóttir skrifar
Rokksveitin Slayer á Secret Solstice-sviðinu sumarið 2018.
Rokksveitin Slayer á Secret Solstice-sviðinu sumarið 2018. Mynd/Secret Solstice

Héraðsdómur Reykjavíkur telur loforð framkvæmdastjóra félagsins Live events, sem stóð að rekstri tónlistarhátíðarinnar Secret Solstice, í fjölmiðlum um greiðslur til listamanna staðfesta ábyrgð félagsins á milljónaskuld við bandarísku hljómsveitina Slayer. 

Dómurinn dæmdi í síðustu viku þrjú félög tengd Secret Solstice og skráðan eiganda þeirra til að greiða umboðsfyrirtæki Slayer eftirstandandi þóknun upp á um sautján milljónir króna.

Málið, sem bar hátt í fjölmiðlum á sínum tíma, er rakið í dómi. Solstice Productions, þáverandi rekstrarfélag tónlistarhátíðarinnar Secret Solstice, samdi upphaflega við Slayer um að koma fram á hátíðinni sumarið 2018. Sveitin hélt tónleikana 23. júní það ár en í ágúst hafði greiðsla upp á 133 þúsund dali ekki borist umboðsfyrirtæki þess, K2 Agency Limited.

Mál var að endingu höfðað og í apríl síðastliðnum var Friðrik Ólafsson, forsvarsmaður félagsins, dæmdur til að greiða umboðsfyrirtækinu umræddar eftirstöðvar þóknunar Slayer. Ekkert hefur enn fengist greitt upp í kröfuna en máli Friðriks hefur verið áfrýjað til Landsréttar.

Umboðsfyrirtækið höfðaði málið á hendur þremur félögum; Live events ehf., L events ehf., Lifandi viðburðum ehf. og Guðmundi Hreiðarssyni Viborg árið 2019 vegna kröfunnar. Fyrirtækið krafðist þess að allir málsaðilar yrðu dæmdir til að greiða sér óskipt umrædda 133 þúsund bandaríkjadali, eða um sautján milljónir króna á núverandi gengi.

Í málinu var annars vegar reynt á það hvort framkvæmdastjóri félagsins Live events ehf. hafi, með yfirlýsingu sem höfð var eftir honum í fjölmiðlum, gefið loforð þess efnis að krafan yrði greidd. Hins vegar reyndi á það hvort hin félögin og Guðmundur teldust bera skaðabótaábyrgð á greiðslu skuldarinnar.

Öll félögin tengd sama fólkinu

Í dómi eru nokkur félög undir jafnmörgum nöfnum, sem tengjast rekstri hátíðarinnar, kynnt til sögunnar; til dæmis Show ehf., auk félaganna sem stefnt er. Sömu einstaklingar tengjast þessum félögum og gamla félaginu, Solstice Productions: systkinin Friðrik og Katrín Ólafsson, auk Jóns Bjarna Steinssonar, eiginmanns Katrínar. Guðmundur Hreiðarsson Viborg er svo stjúpfaðir Jóns Bjarna. Nafn nýs framkvæmdastjóra Live events, Víkings Heiðars Arnórssonar, er fyrst sagt koma fram í gögnum málsins 2018.

Víkingur Heiðar Arnórsson.

Vísað er til þess í dómi að í frétt á vef Vísis, sem birtist í febrúar 2019, hafi verið haft eftir Víkingi að gert yrði upp við alla listamenn sem ekki hefðu fengið greitt fyrir að koma fram á Secret Solstice sumarið 2018. Sambærileg yfirlýsing var höfð eftir honum í frétt á Mbl um málið sama dag. Umboðsfyrirtækið taldi Víking með þessum loforðum hafa tekið sér ábyrgðarskuldbindingu vegna skuldar Secret Solstice við Slayer.

Að mati umboðsfyrirtækisins snerist málið í grundvallaratriðum um það „hvort hægt sé með kennitöluflakki og misnotkun á einkahlutafélagaforminu að komast hjá því að greiða lögmætar skuldbindingar sem hafi stofnast við rekstur árlegrar tónlistarhátíðar en halda rekstri og raunverulegu eignarhaldi hátíðarinnar þrátt fyrir það áfram í óbreyttu horfi,“ segir í dómi.

Yfirlýsing Víkings skýr og ótvíræð

Félögin þrjú og Guðmundur mótmæltu málatilbúnaði umboðsfyrirtækisins í heild sinni; hann væri einhliða og fullyrðingar órökstuddar. Stefndu ættu enga aðild að máli um hina meintu kröfu, auk þess sem Víkingur framkvæmdastjóri hefði „aldrei getað skuldbundið félagið á þann hátt sem stefnandi byggi á“.

Dómurinn mat það þó svo að yfirlýsing Víkings væri „skýr og ótvíræð“ enda væri í henni staðhæft fyrirvaralaust að gert yrði upp við alla listamenn sem ekki hefðu fengið greitt fyrir að koma fram á hátíðinni árið 2018. Ekki væri vafi á því að Víkingur hefði skuldbundið Live events til þessa.

Þá var það niðurstaða dómsins að öll „L-félögin þrjú“; Lifandi viðburðir, Live events og L events hafi verið rekin eins og eitt félag. Hvorki lagalegur né viðskiptalegur grundvöllur hefði verið til að reka hátíðina í fleiri en einu félagi.

„Af þeim sökum og vegna hinna ólögmætu og saknæmu ráðstafana stjórnenda þeirra við að koma hagsmunum Solstice yfir í L-félögin telur dómurinn að þau verði öll að bera óskipta bótaábyrgð á því tjóni stefnanda sem rekja má til háttsemi stjórnenda þeirra,“ segir dómurinn.

Samkvæmt framlögðum gögnum væri Guðmundur jafnframt eini eigandi allra L-félaganna og stjórnarmaður í þeim öllum. Því féllst dómurinn á að hann, ásamt L-félögunum, beri skaðabótaábyrgð á tjóninu. Félögin, auk Guðmundar, voru þannig dæmd til að greiða umrædda 133 þúsund bandaríkjadali, auk vaxta og 2,7 milljóna króna í málskostnað.


Tengdar fréttir

Secret Solstice verður tónleikaröð í stað tónlistarhátíðar

Secret Solstice fer fram með breyttu sniði í ár. Frítt verður á tónleikana en áhorfendum býðst að styrkja UNICEF. Næstu átta helgar fara fram útitónleikar og langar skipuleggjendum með þessum hætti að bæta tónlistarfólki upp tekjutapið vegna frestun hátíðarinnar.

Lofaði að selja tvær fasteignir til að gera upp skuldina við Slayer

Friðrik Ólafsson skipuleggjandi tónlistarhátíðarinnar Secret Solstice var dæmdur í Héraðsdómi Reykjavíkur í gær til að greiða umboðsfyrirtæki bandarísku hljómsveitarinnar Slayer um 20 milljónir króna í eftirstandandi þóknun fyrir að spila á hátíðinni í júní 2018.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.