Innlent

Yfirlýsing frá fjölskyldunni: „Síðustu vikurnar voru móður okkar hreint kvalræði“

Sunna Karen Sigurþórsdóttir skrifar
Eva Hauksdóttir, dóttir konunnar, sendir yfirlýsinguna fyrir hönd systkinanna.
Eva Hauksdóttir, dóttir konunnar, sendir yfirlýsinguna fyrir hönd systkinanna. Vísir/Vilhelm

„Síðustu vikurnar voru móður okkar hreint kvalræði,“ segir í yfirlýsingu frá fjölskyldu konu sem lést í umsjá læknis á Heilbrigðisstofnun Suðurnesja. Læknirinn er grunaður um alvarleg mistök í starfi sem hafi leitt til andláts konunnar, líkt og fréttastofa hefur greint ítarlega frá. Fjölskyldan segir lækninn hafa sett móður þeirra á líknandi meðferð, án þess að forsendur væru fyrir því og án þess að upplýsa um meðferðina. Þau vilja að málið verði rannsakað sem manndráp.

Engar forsendur fyrir líknandi meðferð

Í yfirlýsingunni segir að þegar konan, sem var áttræðisaldri, lagðist inn hafi hún ekki verið greind með neinn lífsógnandi sjúkdóm og ekki á neinum sterkum lyfjum. „Hún var sett á lífslokameðferð samdægurs, án þess að vera spurð álits á því eða vera upplýst um það,“ segir fjölskyldan.

Tekið er fram að í áliti landlæknis séu gerðar athugasemdir við fjölda þátta í meðferð stofnunarinnar.

„Þær alvarlegustu varða lífslokameðferð sem hún sætti án þess að nokkrar forsendur væru fyrir hendi sem réttlættu þá ráðstöfun. Lífslokameðferð er lokastig líknarmeðferðar og felur það í sér að ekkert er gert til að lengja líf sjúklings, sýkingar ekki meðhöndlaðar og næringu og vökva ekki haldið að sjúklingnum. Slíkri meðferð er aðeins beitt þegar sjúklingur er að dauða kominn og stendur hún venjulega aðeins í örfáa daga.“

Fjallað var um málið í fréttum Stöðvar 2 í kvöld. 

Þá segir að þrátt fyrir ítrekaðar spurningar hafi engar skýringar fengist á því hvaða sjúkdómar væru að draga móður þeirra til dauða eða hvers vegna hún væri á stórum skömmtum af slævandi lyfjum. Er því einnig haldið fram að umræddur læknir og annar læknir á stofnuninni hafi farið með ósannindi sem hafi verið til þess fallin að koma í veg fyrir björgunaraðgerðir aðstandenda.

Sögð vera með „hegðunarvandamál“

„Síðustu vikurnar voru móður okkar hreint kvalræði. Þar sem henni var haldið í lyfjamóki var ekki hægt að ná eðlilegu sambandi við hana. Þegar hún gerði tilraunir til að hafna meðferð, t.d. með því að losa sig við nálar og lyfjaplástra var litið á það sem hegðunarvandamál. Sýkingar voru ekki meðhöndlaðar. Þegar fór að draga svo af henni að hún hætti að bera sig eftir næringu og vökva var ekkert gert í því. Enda var hún á lífslokameðferð - án ástæðu“

Fjölskyldan bendir á að fram hafi komið í fréttum að mál læknisins sé á borði lögreglu. „Hvað nákvæmlega það er sem lögreglu var falið að rannsaka er þó óljóst,“ segir í yfirlýsingunni, en fréttastofa hefur einnig reynt að fá upplýsingar um hvers eðlis rannsóknin sé, en ekki haft erindi sem erfiði.

Vilja að málið sé rannsakað sem manndráp

„Við systkinin höfum komið þeirri afstöðu á framfæri við lögregluna á Suðurnesjum að við teljum álit landlæknis gefa tilefni til þess að rannsaka málið sem manndráp,“ segir fjölskyldan.

„Vísum við í því sambandi til lokaorða í álitsgerðinni. Þar kemur fram að gögn málsins styðji ekki þær skýringar læknisins að lifslokameðferð hafi verið skráð fyrir mistök en að í raun hafi verið um einkennameðferð að ræða. Telur landlæknir að þvert á móti hafi meðferðin frá fyrsta degi verið samsvarandi lífslokameðferð að eðli og framkvæmd.“

Vísað er í álit landlæknis:

„Þetta hafði þær afleiðingar að mati landlæknis að í ellefu vikna langri legu hrakaði DJ; hún var með legusár, næringarskort og sýkingar allt fram til andlátsins, sem verður að telja líklegt að hafi orðið fyrr en ella vegna þeirrar meðferðar sem hún hlaut.“

Konan var 73 ára þegar hún lést.

Undir yfirlýsinguna skrifa börnin hennar; Eva Hauksdóttir, Hugljúf Dan Hauksdóttir Borghildur Hauksdóttir og Guðbjörn Dan Gunnarsson.

Heilbrigðisstofnun Suðurnesja hefur hafnað öllum viðtölum. Fréttastofa greindi frá því í gær að athugasemdir hafi verið gerðar við störf fleiri lækna hjá HSS. Þá var rætt við forseta bæjarstjórnar Reykjanesbæjar sem sagði fólk veigra sér við því að leita á stofnunina. Viðtalið má sjá hér fyrir neðan.


Tengdar fréttir

Læknirinn nú við störf hjá Landspítala

Fyrrverandi læknir sem grunaður er um röð alvarlegra mistaka í störfum sínum hjá Heilbrigðisstofnun Suðurnesja er nú við störf á Landspítalanum. Hann er ekki með starfsleyfi sem læknir. Kæra hefur verið lögð fram á hendur lækninum og lögreglurannsókn er hafin.

Bar því við að hafa ekki haft nægi­lega þekkingu á lífs­loka­með­ferðum

Læknir, sem grunaður er um röð alvarlegra mistaka í störfum sínum hjá Heilbrigðisstofnun Suðurnesja, bar því við að hafa ekki haft nægilega þekkingu á svokölluðum lífslokameðferðum sem hann hafði umsjón með hjá stofnuninni, samkvæmt heimildum fréttastofu. Þá hefur fréttastofa einnig heimildir fyrir því að athugasemdir hafi borist á hendur fleiri læknum hjá stofnuninni.

Segir lækninn hafa neitað móður hans um meðferð

Sonur aldraðrar konu sem þurfti að leita læknisaðstoðar á Heilbrigðisstofnun Suðurnesja í kjölfar slyss segir að móður sinni hafi hreinlega verið neitað um meðferð af lækni hjá stofnuninni, en sá er grunaður um röð alvarlegra mistaka í störfum sínum með þeim afleiðingum að minnsta kosti einn sjúklingur er látinn.

Læknir grunaður um röð alvarlegra mistaka

Fyrrverandi læknir á Heilbrigðisstofnun Suðurnesja sætir rannsókn vegna gruns um vanrækslu og röð alvarlegra mistaka sem leiddu til andláts að minnsta kosti eins sjúklings. Málið er á borði lögreglu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.