Erlent

Áfrýjun Navalnís hafnað

Samúel Karl Ólason skrifar
Alexei Navalní í dómsal í dag.
Alexei Navalní í dómsal í dag. EPA/YURI KOCHETKOV

Áfrýjunardómstóll í Moskvu hefur hafnað áfrýjun Alexei Navalní varðandi fangelsisdóms sem hann hlaut nýverið. Stjórnarandstæðingurinn rússneski verður mögulega sendur til fanganýlendu í dag.

Navalní var þann 2. febrúar dæmdur til fangelsisvistar fyrir að hafa brotið gegn skilorði þegar hann var fluttur í dái til Þýskalands í fyrra, eftir að eitrað var fyrir honum með taugaeitrinu Novichok í Rússlandi. Hann var handtekinn við komuna til Moskvu í síðasta mánuði og gefið að sök að hafa rofið skilorð vegna umdeilds dóms sem hann fékk fyrir fjárdrátt árið 2014.

Hann var dæmdur í tveggja ára og átta mánaða fangelsi og áfrýjaði dómnum. Sú áfrýjun var tekin fyrir í dag en hafnað. Dómari stytti þó dóm Navalnís vegna þess að hann hafði áður setið í stofufangelsi og þarf hann því að verja tveimur og hálfu ári í fanganýlendu í Síberíu.

Í málflutningi sínum sagði Navalní að hann hefði ekki brotið gegn skilorði sínu. Hann hefði ekki getað verið í sambandi við fangelsismálayfirvöld því hann hefði verið að jafna sig eftir eitrun.

Hann sagðist ekki vilja monta sig en benti á að allur heimurinn hefði vitað hvar hann væri og hann hefði snúið heim um leið og hann hafi jafnað sig.

Í ræðu sinni vísaði Navalní í biblíuna, söguna um Harry Potter og jafnvel teiknimyndaþættina Rick and Morty og hvatti hann Rússa til að láta ekki undan þrýstingi frá yfirvöldum og berjast fyrir sanngjarnari Rússlandi.

Beindi hann orðum sínum til dómarans og bað hann um að ímynda sér hvað það gæti verið gott að búa í Rússlandi án allra lyganna. Án þess að fólk væri að segja honum hvernig hann ætti að dæma.

Þá sagðist Navalní ekki sjá eftir neinu.

Mannréttindadómstóll Evrópu komst að þeirri niðurstöðu í vikunni að líf Navalnís væri í hættu og að sleppa ætti honum úr haldi.

Navalní var svo færður aftur fyrir dómara skömmu síðar vegna annars máls gegn honum. Það snýr að ummælum hans um uppgjafahermann sem barðist í seinni heimsstyrjöldinni. Hann og aðrir tóku þátt kynningarmyndbandi fyrir stjórnarskrárbreytingar Vladimírs Pútín, sem gera honum kleift að sitja í embætti forseta Rússlands til ársins 2036.

Navalní kallaði hermanninn og aðra svikara og ýmislegt annað. Saksóknarar hafa farið fram á að Navalní verði sektaður vegna þeirra ummæla. Sjálfur segir hann að þetta mál, og önnur gegn honum, sé ætlað að þagga niður í honum.

Max Seddon, blaðamaður Financial Times í Moskvu, fylgdist með málaferlunum í dag. Hann segir Navalní hafa flutt aðra ræðu í seinni réttarhöldunum og gagnrýnt ríkið harðlega vegna málsins. Gífurlega miklum peningum hefði verið eytt í málið gegn Navalní, sem hefði verið hægt að verja í eitthvað annað, þar á meðal málefni uppgjafahermanna.

Búist er við úrskurði í því máli seinna í dag.


Tengdar fréttir

Navalní aftur í dómsal

Alexei Navalní, sem var nýverið gert að verja tveimur árum og átta mánuðum í fanganýlendu mun sömuleiðis verja deginum í dag í dómsal vegna meintra meiðyrða. 

Rússneskur ritstjóri í fangelsi fyrir tíst

Sergei Smirnov, ritstjóri sjálfstæða miðilsins Mediazona í Rússlandi, var í gær dæmdur í 25 daga fangelsi vegna tísts. Smirnov endurtísti tísti annars manns um að hann væri líkur söngvara hljómsveitarinnar Tarakany Dmitry Spirin.

Segja gagnrýni vesturlanda vera móðursýki

Yfirvöld í Rússlandi hafa hafnað gagnrýni frá vesturlöndunum vegna fangelsisdóms stjórnarandstæðingsins Alexei Navalní og segja hana vera móðursýki. Navalní var í gær dæmdur til tveggja ára og átta mánaða vistar í fanganýlendu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.