Stoppaði í lúgunni á McDonald's í kappakstri

Á fjórtánda hring klessti Aric Almirola á forystusauðinn Alex Bowman sem leiddi af sér sextán bíla árekstur. Skömmu síðar var ákveðið að stöðva keppni vegna þrumuveðurs.

Keppendur nýttu tækifærið til að fá sér að borða og margir hverjir fóru í bílalúgu til að ná sér í mat.

Ross Chastain, sem ekur Chevrolet númer 42, brá sér á McDonald's og keypti mat fyrir allt teymið sitt.

Konan í bílalúgunni á McDonald's var afar hissa á þessari heimsókn og sagðist aldrei hafa hitt ökuþór.

Það lá reyndar beinast við hjá Chastian og félögum að koma við á McDonald's því á bílnum þeirra er auglýsing frá hamborgarastaðnum fræga.

Hamborgarinn virtist fara ágætlega í Chastian sem endaði í 7. sæti kappakstursins. Hann var í 13. sæti þegar keppni var stöðvuð.

Michael McDowell hrósaði sigri á Daytona 500 sem er stærsti kappakstur tímabilsins í NASCAR.