215 milljónir til uppbyggingar atvinnulífs á Seyðisfirði

Atli Ísleifsson skrifar 12. febrúar 2021 13:20

Sveitarfélagið Múlaþing og Austurbrú hafa staðið fyrir umfangsmikilli greiningu á atvinnulífinu á Seyðisfirði sem hefur leitt í ljós að mikilvægt er styðja þétt við heimamenn, ekki hvað síst á allra næstu mánuðum. Vísir/Egill

Ríkisstjórnin hefur ákveðið að gera samkomulag til þriggja ára við sveitarfélagið Múlaþing og Austurbrú, samstarfsvettvang stjórnsýslu á Austurlandi, um uppbyggingu atvinnulífs á Seyðisfirði. Verkefninu fylgir 215 milljóna framlag á næstu þremur árum.

Þetta var ákveðið á ríkisstjórnarfundi í morgun. Í tilkynningu á vef stjórnarráðsins segir að atvinnulífið á Seyðisfirði standi frammi fyrir fordæmalausum og fjölþættum vanda í kjölfar aurskriðanna í desember.

Vandinn snúi meðal annars að rekstrarumhverfi og húsnæðismálum, en hamfarirnar höfðu veruleg áhrif á fjölda fyrirtækja sem sum hver hafi misst húsnæðið og hætta á að einhver þeirra hverfi úr bænum.

„Sveitarfélagið Múlaþing og Austurbrú hafa staðið fyrir umfangsmikilli greiningu á atvinnulífinu á Seyðisfirði sem hefur leitt í ljós að mikilvægt er styðja þétt við heimamenn, ekki hvað síst á allra næstu mánuðum.

Samkomulagið sem samgöngu- og sveitarstjórnarráðuneytið hefur undirbúið byggist á tillögum Múlaþings og Austurbrúar. Markmið þess er að styðja við atvinnulíf og samfélag á Seyðisfirði. Byggðastofnun er tilbúin til að vera til ráðgjafar og horft verður til reynslu og aðferðafræði Brothættra byggða.

Heildarframlagið er sem fyrr segir 215 milljónir. Árið 2021 verður framlagið 105 millj. kr. og 55 millj. kr. hvort ár, 2022 og 2023. Gert er ráð fyrir að fjármagninu verði m.a. varið í ráðningu rekstrarráðgjafa, í endurskipulagningu, í nýsköpunar og þróunarsjóð og leigustuðning,“ segir í tilkynningunni.

Múlaþing Aurskriður á Seyðisfirði Byggðamál Ríkisstjórn Katrínar Jakobsdóttur

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.