Erlent

Yfirgnæfandi meirihluti þingsins samþykkti að ákæra Støjberg

Elín Margrét Böðvarsdóttir skrifar
Inger Støjberg er fyrrverandi ráðherra innflytjendamála í Danmörku.
Inger Støjberg er fyrrverandi ráðherra innflytjendamála í Danmörku. EPA

Meirihluti þingmanna danska þingsins hefur samþykkt tillögu um að Inger Støjberg, fyrrverandi innanríkisráðherra og ráðherra innflytjendamála, skuli stefnt fyrir Ríksrétt. Atkvæði voru greidd um það hvort Støjberg skildi ákærð fyrir Ríkisrétti og var það samþykkt með atkvæðum 139 þingmanna en þrjátíu þingmenn greiddu atkvæði gegn tillögunni.

Henrik Dam Kristiensen þingforseti mun nú vísa málinu til Thomas Rørdam forseta Hæstaréttar.

Rannsóknarnefnd þingsins tilkynnti í síðasta mánuði að Støjberg hafi í ráðherratíð sinni, árið 2016, gefið út ólögleg tilmæli um að láta aðskilja gifta hælisleitendur sem væru yngri en átján ára við komuna til Danmerkur. Støjberg vildi ekki tjá sig um málið þegar danska ríkisútvarpið, DR, óskaði eftir því eftir að niðurstaðan lá fyrir.

Þetta verður sjötta málið í sögu Danmerkur sem fer fyrir Ríkisrétt en aðeins annað málið sem fer fyrir réttinn á síðustu hundrað árum.

Ríkisréttur Danmerkur líkist að miklu leyti Landsdómi á Íslandi. Ríkisréttur Danmerkur er skipaður þrjátíu mönnum – fimmtán dómurum Hæstaréttar og fimmtán einstaklingum sem kosnir eru af þjóðþinginu. Inger Støjberg lét nýverið af varaformennsku í Venstre eftir deilur innan flokksins.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.