Pompidou-safninu í París lokað í fjögur ár

Atli Ísleifsson skrifar 26. janúar 2021 08:43

Bygging Pompidou-safnsins í París var hönnuð af arkitektunum Renzo Piano og Richard Rogers og opnaði árið 1977. Getty

Pompidou-safninu í frönsku höfuðborginni París verður lokað í fjögur ár til að hægt verði að ráðast í nauðsynlegar endurbætur. Menningarmálaráðherra landsins segir þá leið að loka safninu alfarið bæði vera ódýrari lausn og þannig taki endurbæturnar líka skemmri tíma.

Pompidou-safnið er einn af vinsælli áfangastöðum ferðamanna í París, en þar er að finna eitt stærsta safn nútímalistar í Evrópu. Safninu verður lokað frá 2023 og til ársins 2027 samkvæmt áætlun.

Franski menningarmálaráðherrann Roselyne Bachelot segir safnið hafa sýnt skýr merki þess að nauðsynlegt væri að ráðast í endurbætur. Tveir möguleikar hafi verið í stöðunni – annars vegar að halda safninu opnu á meðan ráðist væri í endurbætur, og hins vegar að loka safninu á meðan þær standi yfir.

„Ég valdi seinni kostinn þar sem það tekur skemmri tíma og er sömuleiðis aðeins ódýrara,“ er haft eftir Bachelot í frétt Guardian.

Byggingin sjálf var hönnuð af arkitektunum Renzo Piano og Richard Rogers og opnaði árið 1977.

Alls sóttu 3,2 milljónir manna safnið heim árið 2019. Því var hins vegar lokað stóran hluta síðasta árs vegna faraldurs kórónuveirunnar.

Frakkland Söfn Myndlist Menning

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.