Innlent

Snjóflóð féll í Skagafirði

Elísabet Inga Sigurðardóttir skrifar
Hættustig vegna snjóflóðahættu er á Siglufirði, Ísafirði og Flateyri. Óvissustig er á Norðurlandi og norðanverðum Vestfjörðum.
Hættustig vegna snjóflóðahættu er á Siglufirði, Ísafirði og Flateyri. Óvissustig er á Norðurlandi og norðanverðum Vestfjörðum.

Snjóflóð féll ofan við bæinn Smiðsgerði í Skagafirði. Flóðið tók skúr sem stóð um 250 metrum ofan við bæinn. Ekki er vitað með vissu hvenær flóðið féll en talið er líklegt að það hafi fallið snemma í gær.

Í nótt féll snjóflóð um vegin Eyrarhlíð, milli Ísafjarðar og Hnífsdals. Vegurinn var opinn með óvissustigi vegna snjóflóðahættu en var lokað í kjölfarið. Þetta kemur fram í tilkynningu frá Veðurstofunni.

Dregið hefur úr veðrinu frá því í gærkvöldi og minni úrkoma mælist á flestum sjálfvirkum úrkomumælum en gengur á með dimmum éljum og skafrenningi. Norðanveðrið hefur staðið yfir í viku en spár gera ráð fyrir að heldur eigi að lægja í dag og draga úr úrkomu.

Áhöfnin á varðskipinu Tý var kölluð út á tíunda tímanum í gær til að annast sjúkraflutning á Siglufirði. Þar þurfti maður að komast undir læknishendur á Akureyri og ekki unnt að flytja hann landleiðina né með sjúkraflugi vegna slæms veðurs og ófærðar.

Varðskipið hefur verið til taks á Norðurlandi vegna snjóflóðahættu og slæms veðurs undanfarna daga. Varðskipið Þór verður til taks í Önundafirði vegna snjóflóðahættu á norðanverðum Vestfjörðum.

Björgunarsveitarmenn frá Þórshöfn, Raufarhöfn, Húsavík auk snjómokstursmanna allt frá Þórshöfn til Akureyrar unnu saman að því að fylgja sjúkrabíl frá Þórshöfn til Akureyrar í vondu verði og mikilli ófærð.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×