Lífið

Ástríðuveiðimaður í vegan tilraun

Sylvía Rut Sigfúsdóttir skrifar
Sigurður Leifsson er ástríðufullur veiðimaður en var mjög jákvæður fyrir því að taka þátt í vegantilraun. Það var konan hans Sigríður H. Kristjánsdóttir einnig, enda ástríðukokkur. Dóttir þeirra Isabella lét tilleiðast.
Sigurður Leifsson er ástríðufullur veiðimaður en var mjög jákvæður fyrir því að taka þátt í vegantilraun. Það var konan hans Sigríður H. Kristjánsdóttir einnig, enda ástríðukokkur. Dóttir þeirra Isabella lét tilleiðast. Kjötætur óskast!

„Ég fer dálítið í gæs og svo fer maður náttúrulega á rjúpu, til að ná í jólamatinn. Það eru skemmtilegustu veiðarnar. Maður labbar heilu og hálfu dagana og fær ekki neitt. En það er bara fínt,“ segir Sigurður Leifsson, ástríðuveiðimaður og einn af eigendum World Class.

„Mér finnst virkilega gefandi að þramma einn á fjöllum með sjálfum sér. Svo fer ég á hreindýr og hef farið til Spánar að skjóta villisvín og til Grænlands að veiða sauðnaut.“

Sigurður féllst á, ásamt fjölskyldu sinni, að taka þátt í vegantilraun fyrir sjónvarpsþættina „Kjötætur óskast!.“ Hann fullyrðir þó að hann sé ekki forfallinn veiðimaður - þótt frystikistan heima hjá þeim bendi til annars.

„En allt sem ég skýt, það borðum við.“

Mikill munur á kolefnasporinu

Það verður áskorun fyrir fjölskylduna að skipta yfir á veganfæði. Siggi æfir flesta daga vikunnar og þarf almennilega næringu til að viðhalda vöðvaaflinu, Sigga Dóra konan hans fékk Covid í fyrstu bylgju og er enn í bataferli. Þá er dóttir þeirra Isabella öflug körfuboltakona og æfir stíft. Það er því áríðandi fyrir þau öll að fá næga næringu.

En þau voru afar jákvæð fyrir því að prófa að sneiða hjá öllum dýraafurðum og fannst magnað að átta sig á hversu gríðarlegur munur er á kolefnisspori máltíða eftir því hvort og hvernig kjöt er í þeim.

Fyrsti þáttur af „Kjötætur óskast! Vegan með Lóu Pind“ fer í loftið á Stöð 2 í kvöld kl. 19:10. Í þessari fimm þátta seríu fylgist Lóa með fjórum íslenskum fjölskyldum sem féllust á að taka þátt í fjögurra vikna vegan tilraun. 

Hópurinn fór í ýmsar heilsufarsmælingar áður en tilraun hófst og aftur í lokin til að kanna hvort þessi umbylting á mataræðinu hafði áhrif á heilsu þeirra. Þá skráðu allar fjölskyldurnar mataræði sitt inn í Matarspor EFLU meðan á tilraun stóð. Auk þess var tekin ein samanburðarvika frá því fyrir tilraun, til að kanna hvort kolefnisspor fjölskyldnanna minnkar við að sneiða hjá öllum dýraafurðum.

Klippa: Kjötætur óskast - Ástríðuveiðimaður í vegan tilraun

Framleiðandi og leikstjóri þáttanna er Lóa Pind Aldísardóttir, myndatökumaður er Ívar Kristján Ívarsson og klippingu annaðist Hrafn Jónsson. Framleitt af Lóa Production fyrir Stöð 2. Lóa segir að Verkfræðistofan EFLA hafi veitt ómetanlega aðstoð við útreikninga þáttanna.


Tengdar fréttir

Hugrakkir íslenskir kúabændur taka þátt í vegan tilraun

„Frá því ég var lítil þá hugsaði ég alltaf að prufa sem flest. Áður en ég færi að velja mér starf og annað til að geta dæmt, eða prufað sem flestar hliðar. Þannig að það var það sem ýtti manni út í þetta,“ segir Hrafnhildur Baldursdóttir kúabóndi á Litla-Ármóti á Suðurlandi.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.