Sjáðu bestu snjókallana í Breiðholti

Snjókarlakeppni Breiðholts er haldin í fyrsta sinn í ár á vegum íbúasamtaka hverfisins. Undirtektir hafa  verið góðar að sögn Jóhönnu Dýrunnar Jónsdóttur, formanns Íbúasamtakanna Betra Breiðholt.

„Við erum mjög glöð með þetta,“ segir Jóhanna. „Hugmyndin var bara að gera eitthvað skemmtilegt með íbúunum sem þyrfti ekki að kosta neinn pening. Þetta átti að mynda smá stemningu og samstöðu innan hverfisins og setja líka smá mynd á hverfið.“

Jóhanna deildi þeim myndum sem sendar voru inn á Facebook í gær og segist hafa þurft að loka tölvunni, svo mikið af „like-um“ og ummælum streymdi inn. Myndirnar eru vissulega flottar, en standa allir snjókallarnir enn?

„Nei,“ segir Jóhanna og hlær. „Eftir veðrið hérna 30. desember þá fóru ansi margir þeirra í jafnsléttu. En í staðinn hafa komið nokkrir nýjir á lokasprettinum.“

Tilkynnt verður um sigurvegara strax eftir helgi á Facebook-síðu íbúasamtakanna. Verðlaun verða veitt í nokkrum flokkum og eru það fyrirtæki í hverfinu sem koma að því að útvega verðlaunin.

Hér fyrir neðan má sjá nokkra vel valda snjókalla. Hægt er að skoða þá alla á Facebook-síðu Íbúasamtakanna Betra Breiðholt.