Takmörk á eignarhlut í bönkum

Sigmundur Davíð Gunnlaugsson forsætisráðherra segist þeirrar skoðunar að setja eigi takmörk á hversu stóran hlut hver einstakur eigandi má eiga í íslenskum bönkum.

Þetta kom fram í svari ráðherra við fyrirspurn á Alþingi í gær.

Helgi Hjörvar, þingmaður Samfylkingarinnar, spurði Sigmund Davíð út í stöðu fjármálakerfisins og hvort forsætisráðherra teldi mikilvægt að skilja á milli fjárfestingarbanka og viðskiptabanka.

Sigmundur sagði mögulega svigrúm til að nota lagasetningu til að ýta undir meiri aðskilnað milli ólíkrar bankastarfsemi. Hann væri áhugasamur um að fara þá leið og hefði verið ósáttur við hvernig staðið hafi verið að stofnun nýju bankanna eftir hrun.

Helgi spurði einnig um stöðu innstæðna í viðskiptabönkum og sparisjóðum, hvort þær nytu enn fullrar ríkisábyrgðar og hvort fyrirhugað væri að breyta því. Sigmundur Davíð sagði ríkisábyrgðina standa en benti á að Bjarni Benediktsson fjármálaráðherra hefði tilkynnt að til stæði að endurskoða það fyrirkomulag.