Stóra skilnaðarmálið í Hollywood: Eru Beyonce og Jay Z að skilja?

Slúðurmiðlar um allan heim halda því fram að stjörnuparið Beyonce og Jay Z séu við það að skilja. Nú síðast heldur The New York Post þessu fram.

Allar götur síðan slúðurmiðillinn TMZ fékk í hendurnar myndband þar sem systir Beyonce, Solange, réðst á mág sinn í lyftu eftir Met-ballið í New York, hefur orðrómur þess efnis að parið sé á barmi skilnaðar flogið fjöllum hærra.

Sérlega hefur mikið farið fyrir umfjöllun um þennan meinta skilnað á síðum The New York Post, þar sem blaðið vísar í heimildamenn sem virðast standa parinu nærri.

Það síðasta sem slúðurmiðlarnir greindu frá sem ýtir undir þennan orðróm er að Beyonce hafi verið í húsnæðisleit á Manhattan, án eiginmannsins. 

Heimildamenn The Post greina frá því að nokkrum vikum eftir að myndbandið af Solange ráðast á Jay Z fór eins og eldur í sinu um internetið, hafi söngkonan farið ein og kíkt á þakíbúð í Chelsea-hverfinu á Manhattan. Þetta segja þessir sömu heimildamenn að hljóti að þýða að eitthvað sé að í hjónabandinu því að hún myndi ekki kaupa íbúð af þessari stærðargráðu fyrir fjölskyldumeðlim, auk þess sem Jay Z myndi aldrei vera fáanlegur til að flytja úr risastórri íbúð sinni í TriBeCa í New York.

„Ég get lofað því að Jay er ekki að fara að minnka við sig,“ sagði heimildamaður The New York Post.

Þannig segja heimildamennirnir að það sé ekki spurning um hvort skilnaður sé á næsta leiti, heldur hvenær og hvernig. 

Að sama skapi segja þau að þrátt fyrir að hjónin deili myndum hvert af öðru á Instagram, eins og allt sé í himnalagi, sé eini tíminn sem þau eyði saman á sviði á tónleikaferðalaginu On The Run sem þau lögðu saman í.

Kenningunni um yfirvofandi skilnað þeirra skötuhjúa til frekari stuðnings, ef til vill meira svo en staðhæfingar heimildamanna sem vilja ekki láta nafns síns getið, eru eftirfarandi punktar:

1. Beyonce hefur látið fjarlægja tattú sem hún var með á baugfingri - húðflúr sem hún lét á sig í stað trúlofunarhrings.

2. Á tónleikum parsins í Cincinnati þann 28. júní síðastliðinn breytti Beyonce textanum á lagi sínu Resentment úr:

“I'll always remember feeling like I was no good / Like I couldn't do it for you like your mistress could“ í “I'll always remember feeling like I was no good / Like I couldn't do it for you like that wack bitch could.“

Að sama skapi breytti hún textanum úr:

“Been ridin' with you for six years [...] I gotta look at her in her eyes and see she's had half of me“ í “Been ridin' with you for 12 years [...] I gotta look at her in her eyes and see she's had half of me. She ain't even half of me. That bitch will never be.“

3. Á slúðurmiðlinum Blind Gossip var því haldið fram þann 21. júlí síðastliðinn að par sem væri mikið í sviðsljósinu væri í ferli að skipta upp búi sínu um þessar mundir, en kæmu til með að halda ímyndinni út á við þar til tilkynnt væri um skilnaðinn. Blind Gossip er sama síða og spáði fyrir um skilnað Katie Holmes og Tom Cruise á sínum tíma.

Þá eru enn aðrir sem segja parið snillinga í markaðssetningu og ekki sé ósennilegt að parið sé sjálft að kynda undir orðróminn í þeim tilgangi að selja miða á tónleikaferðalag sitt, en fleiri kaupi miða ef fólk heldur að þetta sé mögulega síðasta tónleikaferðalagið sem hjónin leggja í saman.

Það vekur einnig upp spurningar að Beyonce hafi getað gefið út heila breiðskífu, öllum að óvörum, en allt í einu sé einhver í hennar liði sem geti ekki hætt að leka leyndarmálum til The New York Post.

Tónleikaferðalag parsins endar þann þrettánda september næstkomandi og líklegt þykir að svör við þessum spurningum fáist um það leyti.