Á móti sól í Cavern Club

Poppsveitin Á móti sól datt í lukkupottinn og spilar næstu helgi í hinum heimsfræga klúbbi Cavern Club í Liverpool. Sá staður er þekktastur fyrir að hafa verið afdrep Bítlanna á þeim árum sem þeir störfuðu í heimaborg sinni. Sagt er að sveitin hafi komið þar fram 292 sinnum á ferli sínum. Eftir það hafa margar heimsþekktir flytjendur komið þar fram, til dæmis Little Richard, The Hollies, Jefferson Starship, Rolling Stones og Mínus, sem gerðust svo grófir að sprengja hátalarakerfi hússins. "Þetta er okkar Mekka," segir Heimir Eyvindarson, hljómborðsleikari Á móti sól. "Bæði út af Bítlunum og svo út af Liverpool-fótboltaliðinu. Við erum náttúrulega allir fótboltanördar." Í þetta skiptið borgaði fótboltanördaskapurinn sig svo sannarlega. Tildrög þess að Á móti sól heldur tvenna tónleika í Cavern Club má rekja til þess að sveitin hljóðritaði sína eigin útgáfu af baráttusöng knattspyrnuliðsins, You'll Never Walk Alone. Útgáfan barst til eyrna Phil Neal, fyrrum fyrirliða Liverpool, og David Millar, útvarpsmanns á Radio City 96,7. Millar heillaðist svo af sveitinni að hann kom því í gegn að íslensku poppararnir myndu troða upp á staðnum sögufræga. "Við spilum á föstudagskvöldinu á milli átta og tíu. Við vitum ekki alveg hvort það verður ball- eða tónleikafílingur. Við rennum svolítið blint í sjóinn með það kvöld. Á laugardeginum spilum við fyrir ferðamenn í einn og hálfan tíma einhvern tíma milli klukkan tvö og sex. Mér skilst að staðurinn sé alltaf fullur af þýskum túristum. Þá ætlum við að spila bara okkar eigin lög," segir Heimir og viðurkennir að þetta sé stærsti viðburður sveitarinnar til þessa. Á móti sól heitir AMS í útlandinu en ætlar að syngja á íslensku. Piltarnir ætla að taka með sér kvikmyndatökumann sem eltir þá í viðtölin og á tónleikana til þess að halda minningunni sem ferskastri.