Vegna pistils hr. Baldurs

Forsetaembættið - Erla Óskarsdóttir, hjúkrunarkona og ellilífeyrisþegi. Hr. Baldur getur verið afar rólegur, endalok forsetaembættisins eru ekki í huga þorra Íslendinga. Við viljum hafa forseta, og velja hann í frjálsum kosningum eftir okkar eigin mati og smekk, þar sem meirihlutinn ræður. Dalandi virðing embættisins sem hr. Baldri er tíðrætt um grunar mig að Spaugstofumenn eigi þar stóran hlut að máli. Þeir hafa verið iðnir við að gera grín að ráðamönnum þjóðfélagsins. Löngu er tímabært að því linni, það er ekki fyndið að endurtaka sömu eftirhermurnar viku eftir viku. Ég veit að álíka grín var stoppað í fæðingu þegar átti að grínast með ákveðna athöfn fyrrverandi ástsæls forseta. Mál er að linni, ágætu Spaugstofumenn. Hr. Baldur, ég unni þér að sleppa við grínið að hausti, en þetta er pólitík grínsins. Hvernig hyggst hr. Baldur sporna við eyðslu unglinga? Er það ekki hlutverk heimila og skóla að sjá um þá fræðslu? Allflestir foreldrar, hygg ég að ali börn sín skynsamlega upp varðandi fjármál. Agnúarnir að mínu mati eru m.a. freistandi og lokkandi tilboð lánastofnana um auðveldar lántökur í ýmsu formi og langur vinnutími foreldra sem báðir vinna utan heimilis. Vissulega væri æskilegt að jafna kjörin og jafnvel að draga úr lífsgæðakapphlaupinu og þá hr. Baldur, erum við enn komin út í pólitík. Barátta við fíkniefni hefur tekið miklum stakkaskiptum undanfarin ár. Lögreglan hefur staðið sig mjög vel við erfiðar aðstæður. Vegna eylands okkar vantar okkur meiri mannskap, miklu, miklu fleiri menn til að kljást við þessi óhugnanlegu mál. Það kostar peninga, hr. Baldur, og þá erum við enn einu sinni komin inn í pólitíkina. Vissulega hefur býsna margt verið gert fyrir aldraða, en margt er enn hægt að gera, einkum búa margir sjúkir aldraðir við erfiðar aðstæður, það vantar hjúkrunarpláss, því fleiri þurfa á hjúkrun að halda, þar sem þjóðin eldist. Það kostar peninga. Lengi hafa elli- og lífeyrisþegar óskað eftir að 38,55 prósenta skattur á lífeyrisgreiðslur verði lækkaður t.d. í 10 prósent. Ég hef ekki heyrt neinn stjórnmálamann né -flokk taka það á sína stefnuskrá, hvað þá að lofa þessari lækkun sem yrði töluverð launabót. Þetta er ansi stór hópur sem hefur kosningarétt. Enn og aftur er um að ræða pólitík hr. Baldur, svo þú sérð að það er tæplega hægt að auglýsa sig sem ópólitískan frambjóðanda. Lífið er allt meira og minna pólitík. Að lokum vil ég þakka frábæra pistla þriðjudaginn 8. júní eftir Þráin Bertelsson og grein Valgerðar Bjarnadóttur. Göngum glöð til kosninga 26. júní.