Eiður spilar með ÍBV í sumar

Varnarmaðurinn Eiður Aron Sigurbjörnsson er á leið aftur til ÍBV en það kemur fram á vef Eyjafrétta í dag.

Eiður Aron fór frá félaginu árið 2011 þegar hann samdi við Örebro í Svíþjóð. Þar fékk hann hins vegar lítið að spila og er hann því aftur á leið til síns gamla félags.

Óskar Örn Ólafsson, formaður knattspyrnudeildar ÍBV, staðfestir þetta við vefinn og segir aðeins eftir að ganga frá smáatriðum. Eiður mun skrifa undir samning við ÍBV nú í hádeginu.

Eiður, sem er 23 ára gamall, mun fylla í skarð Rasmus Christiansen í vörninni en sá síðarnefndi fór frá ÍBV nú í haust.