Dýrkeyptur aumingjaskapur

Það er aumingjaskapur af hálfu stjórnvalda að hafa ekki hækkað lágmarksíbúafjölda sveitarfélaga, segir Jóhann Ársælsson, þingmaður Samfylkingarinnar, í pistli á heimasíðu sinni. Hann segir þetta hafa reynst dýrkeypt þar sem þetta hamli flutningi verkefna frá ríkinu til stórra og öflugra sveitarfélaga. Jóhann segir það vanráðið af stjórnvöldum að efna til sveitarstjórnarkosninga án þess að breyta lögum þannig að sveitarfélög þurfi að vera fjölmennari en þau mega nú vera. Því sé fyrirfram vitað að árangur af sameiningarkosningum verði mun minni en ella. Í pistli sínum vísar Jóhann til orða Árna Magnússonar félagsmálaráðherra á kynningarfundi um sameiningu sveitarfélaga í Eyjafirði í gær. Þar sagði Árni að ef ekki tækist að sameina sveitarfélögin með kosningum væri viðbúið að umræðan snerist næst að því að hækka mörk fyrir lágmarksíbúafjölda sveitarfélaga og knýja þannig á um að minnstu sveitarfélögin sameinuðust. Við þetta er að bæta að Árni Magnússon sagði í fréttum Talstöðvarinnar og Bylgjunnar klukkan fjögur að sjálfur ætlaði hann sér ekki að standa að slíkri breytingu. Jóhann fagnar því hins vegar að ráðamenn séu farnir að ræða þennan möguleika og segir: "Stjórnvöld með ráðherra sjálfan í broddi fylkingar ákváðu þó að fara í þetta átak sem nú er að ljúka með kosningum n.k. laugardag án þess að hrófla við ákvæði sveitarstjórnarlaga um að lágmarksíbúafjöldi í sveitarfélagi skuli vera 50 manns. Það var þó öllum ljóst að möguleikar til að flytja verkefni frá hinu opinbera til sveitarfélaganna byggjast á þeirri forsendu að öll sveitarfélög geti veitt svipaða þjónustu og tekið að sér sambærileg verkefni." Jóhann óttast að fámenn sveitarfélög geti dregið úr möguleikum á færslu verkefna frá ríki til sveitarfélaga. "Það er þetta fáránlega 50 íbúa lágmark þar sem kjósendur gætu hæglega verið 30 sem kemur í veg fyrir að nauðsynlegur árangur náist. Á því ber Alþingi  ábyrgð.  Þetta var stjórnvöldum ljóst en þau skorti kjark til að taka á málinu. Sá aumingjaskapur er dýr vegna þess að hann tefur þá nauðsynlegu þróun sem þarf að verða með flutningi verkefna frá ríkinu til stórra og öflugra sveitarfélaga," segir Jóhann.