Hnúka­þeyr gæti sums staðar hækkað loft­hita all­nokkuð

Veðurstofan spáir áframhaldandi útsynningi, það er suðvestanátt með éljum sunnan og vestantil. Má reikna með að vindur verði á bilinu 8 til 15 metrum á sekúndu og hitinn víða frá 0 til 5 stigum.

Spáð er bjartviðri á austanverðu landinu þar sem hnjúkaþeyr gæti sums staðar hækkað lofthita allnokkuð. Má þannig búast við fimm til tíu stiga hita á Austfjörðum ef allt gengur eftir.

Á vef Veðurstofunnar segir að á morgun lægi á vestanverðu landinu og dragi úr ofankomunni en þá snúist í norðvestanátt austantil og gæti verið allhvasst suðaustanlands fram eftir degi.

„Annað kvöld tekur hæð suður í höfum að miklu leyti stjórnina á veðrinu og lægir um allt land.

Það er útlit fyrir heldur mildara loft yfir landinu á laugardag og sunnudag, en kólnar svo aftur eftir helgi, jafnvel með norðan hríð norðantil á aðfaranótt miðvikudags, þó er ekkert endanlegt í þeim efnum,“ segir í hugleiðingum veðurfræðings.

Veðurhorfur á landinu næstu daga

Á föstudag: Vestlæg átt, 8-15 m/s en lægir þegar líður á daginn. Allvíða dálítil él en úrkomulítið eftir hádegi. Frost 0 til 5 stig, en um og yfir frostmarki við S-ströndina.

Á laugardag: Vestan 5-13 og þykknar smám saman upp og dálítil súld eða rigning vestantil annars þurrt að kalla. Hlýnar í veðri og hiti víða yfir frostmarki um kvöldið.

Á sunnudag: Vestan 8-15 og skýjað með köflum en úrkomulítið. Hiti 2 til 7 stig, hlýjast A-lands.

Á mánudag: Stíf vestanátt með rigningu, en þurrt að kalla A-lands. Áfram milt.

Á þriðjudag: Útlit fyrir hægari vestlæga átt og ört kólnandi veður á norðanverðu landinu en dálitl vætu og mildu veðri sunnan og suðvestantil en líkur á norðan hríð norðantil um kvöldið.

Á miðvikudag: Líkur á norðanátt, stöku éljum norðantil og talsverðu frosti.