Svakalegt að sjá eyðilegginguna á Seyðisfirði

Þetta er auðvitað hálf ógnvekjandi. Maður gæti ímyndað sér að þetta væri enn verra ef ekki væri þessi snjóföl hér yfir. En þetta er auðvitað svakalegt að sjá.

Sigurður Ingi segir aurskriðurnar á Seyðisfirði kalla á viðbrögð af hálfu ríkisvaldsins. „Við höfum sagt frá upphafi að við munum bakka samfélagið upp, sveitarfélagið og íbúana, með öllum þeim ráðum sem við höfum.“

Nú þarf að leggja áherslu á hreinsunina, að sögn ráðherrans. En jafnframt þarf að uppfæra áhættumatið, fara í þær aðgerðir sem hægt er að fara í og svo er það endurbygging.

„Á öllum þessum menningarverðmætum sem hér er, húsnæði fyrir fólkið sem hefur misst húsnæði sitt. Að öllu þessu og fleiru þarf að hyggja.“

Spurður segir Sigurður Ingi það hafa verið ótrúlegt happ að Fjarðarheiðin, sem oft er erfið að vetrarlagi, hafi verið fær þegar fjallið tók að skríða yfir þorpið.

Kallar þetta á einhverjar úrbætur á samgöngum hér?

„Það er auðvitað í býgerð, jarðgöng sem munu gjörbreyta öllum aðstæðum hér og svona atburður ítrekar mikilvægi þess að staðið verði við það og það munum við gera.“