Óvenju hlýtt miðað við árstíma

Sunna Kristín Hilmarsdóttir skrifar 11. desember 2020 07:24

Sundlaugarnar opnuðu á ný í gær, mörgum til mikillar gleði, og svo heppilega vill til að það ætti að viðra vel til sundferða um helgina miðað við veðurspá Veðurstofu Íslands. Vísir/Vilhelm

„Nú þegar þetta er skrifað má greina tvær lægðamiðjur suður af landinu. Önnur staðsett 350 km suðsuðvestur af Reykjanesi, en hin 400 km suður af Ingólfshöfða. Báða hafa þær miðjuþrýsting um 970 mb. Staða veðrakerfa breytist lítið á næstunni og segja má að lægðasvæði suður af landinu stjórni veðrinu hjá okkur næstu þrjá daga eða jafnvel lengur.“

Svo segir í hugleiðingum veðurfræðings á vef Veðurstofu Íslands þar sem farið er yfir helgarveðrið fram undan.

Veðurspáin fyrir daginn í dag, morgundaginn og sunnudag er mjög svipuð fyrir alla dagana þrjá vegna fyrrnefnds lægðasvæðis.

Það er útlit fyrir austanátt, yfirleitt á bilinu átta til fimmtán metra á sekúndu en stundum hvassari í vindstrengjum með suðurströndinni og Vestfjörðum.

Þá er ákveðin rigningarspá fyrir Suðausturland og Austfirði. Í öðrum landshlutum má búast við dálítilli vætu öðru hverju, en þurrir kaflar verða þess á milli.

Tiltölulega hlýr loftmassi berst yfir landið með austanáttinni og hitinn er því yfir meðallagi árstímans, eða á bilinu þrjú til níu stig.

Veðurhorfur á landinu:

Austlæg átt, yfirleitt á bilinu 8-15 m/s, en hvassari með köflum við suðurströndina og á Vestfjörðum. Samfelld rigning á Suðausturlandi og Austfjörðum. Dálítil væta af og til í öðrum landshlutum. Hiti 3 til 9 stig. Svipað veður áfram á morgun.

Á laugardag og sunnudag:

Austanátt, víða 10-15 m/s, en 15-20 í vindstrengjum með suðurströndinni. Rigning á Suðausturlandi og Austfjörðum, en úrkomulítið í öðrum landshlutum. Hiti 2 til 7 stig.

Á mánudag og þriðjudag:

Útlit fyrir allhvassa norðaustlæga átt. Rigning eða slydda á austanverðu landinu og með norðurströndinni, en þurrt um landið suðvestanvert. Hiti 1 til 6 stig, mildast syðst.

Á miðvikudag og fimmtudag:

Líklega ákveðin norðaustlæg átt áfram. Dálítil snjókoma eða slydda norðan- og austanlands, hiti nærri frostmarki. Þurrt sunnan heiða og hiti 1 til 5 stig.

Veður

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir