Heimsmarkmiðin

Kolsvört spá Sameinuðu þjóðanna um mannúðarþörf á næsta ári

Heimsljós
UNHCR/Eugene Sibomana

Sameinuðu þjóðirnar telja að á næsta ári þurfi 235 milljónir manna á mannúðaraðstoð að halda, einn af hverjum 33 jarðarbúum.

Sárafátækum fjölgar hratt og Sameinuðu þjóðirnar telja að á næsta ári þurfi 235 milljónir manna á mannúðaraðstoð að halda, fleiri en nokkru sinni fyrr, einn af hverjum 33 jarðarbúum. Fjölgunin milli ára nemur 40 prósentum. „Stríðsátök, loftslagsbreytingar og COVID-19 hafa skapað þessa stærstu áskorun sem við stöndum frammi fyrir frá dögum síðari heimsstyrjaldar,“ segir António Guterres aðalframkvæmdastjóri Sameinuðu þjóðanna.

Forsíða skýrslunnar

Samtökin kalla eftir 35 milljarða bandarískra dala framlögum til þess að mæta þörfinni fyrir mannúðaraðstoð á komandi ári. Guterres hvatti framlagsríki til þess að styðja þá sem væru í mestri hættu „á dimmustu stund neyðarinnar,“ eins og hann orðaði það í gær þegar Sameinuðu þjóðirnar kynntu stöðuskýrslu sína um mannúðaraðstoð, Global Humanitarian Overview 2021.

Mark Lowcock yfirmaður Samhæfingarskrifstofu aðgerða í mannúðarmálum (OCHA) segir að fjölgun þeirra sem búi við neyð sé nánast algerlega tilkomin vegna COVID-19. Rúmlega 63 milljónir staðfestra smita eru skráð í heiminum og 1,5 milljónir manna hafa látist. Tugir milljóna manna hafa misst atvinnu og lífsviðurværi vegna aðgerða til að hefta útbreiðslu veirunnar.

„Það er ekki sjúkdómurinn sjálfur, eins andstyggilegur og hann er, sem bitnar mest á fólki í fátækum ríkjum. Það eru efnahagslegu áhrifin,“ segir Mark Lowcock. „Hækkandi verð á matvælum, tekjusamdráttur, minni greiðslur brottfluttra, röskun á bólusetningum, lokanir skóla – þetta kemur verst niður fátækasta fólkin í fátækustu ríkjunum.“

Sameinuðu þjóðirnar hafa áður varað við því að hungur í sjö ríkjum geti komist á það stig, að óbreyttu, að flokkast undir hungursneyð á næsta ári. Um er að ræða Afganistan, Búrkina Fasó, Lýðstjórnarlýðveldið Kongó, Eþíópíu, Nígeríu, Suður-Súdan og Jemen. Fyrir hálfum mánuði veitti Neyðarsjóður Sameinuðu þjóðanna (CERF) 100 milljónum Bandaríkjadala til að draga úr hættunni á hungursneyð.

Samkvæmt áætlunum í nýju skýrslunni er fyrirhugað að ná til 160 milljóna manna sem lifa við mestu þrengingarnar. Sá fjöldi býr í 56 þjóðríkjum og kostnaðurinn nemur 35 milljörðum Bandaríkjadala, eins og áður sagði. „Ef við komumst gegnum árið 2021 án hungursneyðar verður það meiriháttar árangur. En við vitum líka að rauð ljós blikka og viðvörunarbjöllur hringja,“ segir Mark Lowcock.

Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.