Lífið

Tók áður enga ábyrgð á sjálfri sér og hjálpar nú öðrum í sömu stöðu

Sylvía Rut Sigfúsdóttir skrifar
Halldóra Halldórsdóttir segir að of margir foreldrar langveikra barna gleymi að setja eigin andlega og líkamlega heilsu í forgang.
Halldóra Halldórsdóttir segir að of margir foreldrar langveikra barna gleymi að setja eigin andlega og líkamlega heilsu í forgang. Spjallið með Góðvild

„Það er í byrjun árs 2019 sem ég lendi alveg á vegg og fer út frá því að hugsa betur um sjálfa mig, setja mig ofar á forgangslistann,“ segir Halldóra Hanna Halldórsdóttir. Undanfarinn var sá að Halldóra eignaðist langveikt og fjölfatlað barn í apríl árið 2013. Hún ákvað eftir nokkur erfið ár að líta inn á við og gera breytingar.

„Ég var búin að vera í fimm til sex ár í mikilli vanlíðan og fórnarlambsgír, eins og ég vil kalla það,“ segir Halldóra í nýjasta þættinum af Spjallið með Góðvild. Þar segist hún í byrjun hafa hugsað af hverju hún hefði eignast þetta barn og hvað hún hefði gert til að „eiga þetta skilið.“

Lífið breyttist mikið eftir að hún eignaðist langveikt barn en í dag er Halldóra ánægð með margar breytingarnar sem hún hefur gert núna á eigin lífi og hugarfari. Þessa reynslu ætlar hún að nota til að hjálpa öðrum.

„Ég vil meina að hann hafi komið í líf mitt til að ranka við mér og koma mér í þakklætið fyrir það sem maður hefur.“

Halldóra segir að margir í sömu stöðu og hún var í, geri sér ekki endilega grein fyrir því hvað þeir eru fastir í sínum neikvæðu hugsunum. Sjálf var hún í mikilli andlegri og líkamlegri vanlíðan.

„Ég var ekki að taka neina ábyrgð á sjálfri mér. Þegar ég fer svo í sjálfsvinnuna þá er það þessi breyting að ég tek fulla ábyrgð á sjálfri mér og geri mér grein fyrir því að það er enginn að fara að hjálpa mér að verða hamingjusöm, komast eitthvað áfram í lífinu eða líða vel, annar en ég sjálf.“

Markþjálfun getur skipt sköpun fyrir fólk sem þarf stuðning til að stíga sín fyrstu skref í átt að betra lífi. Halldóru langar nú að hjálpa öðrum að komast á betri stað í lífinu og þá sérstaklega öðrum foreldrum langveikra barna sem á hverjum degi glíma við gífurlegt álag og áskoranir.

„Þjáningin þarf oft að vera búin að vera það mikil á þessum stað að við loksins rönkum við okkur og förum að gera eitthvað í okkar málum.“

Í þessum þætti ræðir Halldóra hvernig hún er búin að breyta erfiðri og neikvæðri reynslu yfir í jákvæða breytingu með sjálfskoðun sem umturnaði lífi hennar.

„Það er kannski skrítið segja þetta, að maður sé þakklátur fyrir að fá fjölfatlað barn sem lifir við miklar þjáningar í lífinu. En ég er í alvöru þakklát fyrir það því að ég trúi því að hann hafi komið hingað til að kenna mér.“

Hægt er að hlusta á viðtalið í heild sinni í spilaranum hér fyrir neðan.

Klippa: Spjallið með Góðvild Halldóra Hanna Halldórsdóttir

Þættirnir Spjallið með Góðvild eru sýndir á Vísi á þriðjudögum. Verkefnið er afurð margra ára samstarfs Sigurðar Hólmars Jóhannessonar sem er í stjórn Góðvildar og Ágústu Fanneyjar Snorradóttur kvikmyndagerðarkonu og eiganda Mission Framleiðslu. 

Þættirnir eru nýr vettvangur til að koma málefnum langveikra og fatlaðra barna á framfæri og auka í leiðinni sýnileika fyrir mikilvæg málefni. Hægt er að hafa samband við Sigurð og Ágústu Fanney vegna þáttanna í gegnum vefsíðuna www.godvild.is eða samfélagsmiðla félagsins. Með því að styrkja Góðvild þá ertu að styðja við langveik og fötluð börn á Íslandi. Styrktarreikningur 0301-26-660117, kennitala 6601172020.


Tengdar fréttir

„Ég veit ég þarf að jarða barnið mitt“

Móðir fjölfatlaðs drengs segir meira en að segja það að sjá um barn sem er fjölfatlað og að fólk þori ekki alltaf að tala um óþægilegu hliðarnar á þeim málum. Því vilji hún breyta.

„Þurfum að gæta að því að það sé enginn útskúfaður úr samfélaginu“

Foreldrar langveikra og fatlaðra barna hvetja Sjúkratryggingar Íslands til þess að endurskoða reglugerð varðandi endurgreiðslu í tengslum við kaup á hjólastólahjólum og öðrum hjálpartækjum. Framkvæmdastjóri landssambands hreyfihamlaðra segir að það sé nauðsynlegt að tryggja jafnan aðgang allra að hjólum.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.