Kjötlaust tvo daga vikunnar í Danmörku

Ekkert kjöt verður á boðstólunum í mötuneytum danskra ríkisstofnanna tvo daga í viku ef ný innkaupastefnastefna danskra stjórnvalda er samþykkt. Þá mætti ekki bjóða upp á lamb eða naut oftar en einu sinni í viku. 

Danska ríkisútvarpið greindi frá og hafði eftir fjármálaráðherranum Nicolai Wammen að vonandi verði tekið vel í breytingarnar, þær séu hugsaðar til að berjast gegn loftslagsbreytingum.

„Þetta er ein leið sem við viljum fara til þess að minnka kolefnisfótspor okkar, að hafa ekkert kjöt tvo daga vikunnar í ríkismötuneytum. Aðra daga má svo fá sér kjöt ef maður vill,“ sagði Wammen.

Breytingarnar myndu ná til um 85.000 starfsmanna. Þá er búist við því að ríkishlutafélög muni fylgja stefnunni í framhaldinu en hjá þeim starfa um 75.000 manns.