Þrjátíu og sex sagt upp hjá fyrirtæki í veitingageiranum

Vinnumálastofnun barst í gærkvöldi tilkynning um hópuppsögn. Um er að ræða fyrstu hópuppsögnina í þessum mánuði. Þar var á ferðinni fyrirtæki í veitingageiranum og segir Unnur Sverrisdóttir forstjóri Vinnumálastofnunar að þrjátíu og sex manns hafi misst vinnuna.

Unnur segir að ekki sé þó loku fyrir það skotið að fleiri hópuppsagnir berist stofnuninni enda enn nokkrir dagar eftir af októbermánuði.

Í september bárust Vinnumálastofnun níu tilkynningar um hópuppsagnir, þar sem 324 starfsmönnum var sagt upp störfum.