Björn Ingi segir enga kröfu um gjald­þrota­skipti hafa borist

Fjölmiðlamaðurinn Björn Ingi Hrafnsson, sem heldur úti Viljanum, segir enga kröfu um gjaldþrotaskipti á Útgáfufélagi Viljans hafa borist. Fyrr í kvöld var greint frá því að sýslumaðurinn á Vesturlandi hefði gert slíka kröfu og fyrirtaka vegna hennar væri á dagskrá Héraðsdóms Vesturlands í næsta mánuði.

„Ég las þetta því fyrst í kvöld og brá nokkuð í brún. Um er að ræða lítið útgáfufélag með litlar skuldir og einn starfsmann (Björn Ingi á Viljanum) og þegar í kvöld hefur verið [farið] fram á afturköllun þessarar beiðni sem gengið verður frá í vikunni. Það þarf ekki mikinn sérfræðing til að átta sig á því að hart er í ári hjá fjölmiðlum og auglýsingatekjur litlar í þessu furðulega ástandi,“ skrifar Björn Ingi á Facebook-síðu sinni í kvöld.

Hann segir þá að það séu eingöngu auglýsinga og styrkjatekjur Viljans, auk sölu á bók hans um kórónuveiruna, sem standi undir launum og öðrum kostnaði í tengslum við rekstur Viljans.

„Ég er þakklátur öllum sem leggja því lið og mun halda ótrauður áfram. Uppgjöf er ekki möguleiki í miðju stríði. Ást og friður,“ skrifar Björn Ingi.