Breska ríkisútvarpið fjallar um mjaldrasysturnar

Vésteinn Örn Pétursson skrifar 28. september 2020 23:00

Litla Grá og Litla Hvít. Mynd/Sealife Trust

Breska ríkisútvarpið birti í dag stutta umfjöllun um mjaldrasysturnar Litlu Grá og Litlu Hvít sem í síðasta mánuði var komið fyrir í varanlegum heimkynnum sínum í Klettsvík við Vestmannaeyjar. Þær voru fyrst um sinn í aðlögunarkví í víkinni en leika nú lausum hala í nýjum heimkynnum sínum.

BBC fjallar í innslagi sínu um að systurnar hafi áður verið í dýragarði í Kína. Þær synda nú í fyrsta sinn í náttúrulegu umhverfi í hafinu síðan þær voru fluttar frá rússneskri hvalrannsóknarstöð árið 2011.

Í umfjöllun sinni heldur BBC því þá fram að talið sé að systurnar séu fyrstu mjaldrarnir sem hafa verið færðir aftur í opið hafsvæði eftir að hafa verið í haldi manna. Þó sé ólíklegt að þær systur muni geta lifað af algerlega óstuddar í opnu hafinu.

Klettsvík er staðsett við mynni Vestmannaeyjahafnar en hópur sérfræðinga og dýralækna fylgdu Litlu Grá og Litlu Hvít í flutningunum þann 10. ágúst síðastliðinn. Fyrir flutningana í víkina höfðu þær dvalist í aðlögunarlaug í Vestmannaeyjum.

Hér að neðan má sjá innslag BBC um þær systur.

Vestmannaeyjar Mjaldrar í Eyjum

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.