45 greindust með veiruna innanlands

Kristín Ólafsdóttir skrifar 25. september 2020 11:06

28 voru í sóttkví við greiningu. Þorkell Þorkelsson/Landspítali háskólasjúkrahús

45 greindust með kórónuveiruna innanlands í gær. Meirihluti, eða 28 þeirra sem greindust, voru í sóttkví.

Þetta kemur fram í uppfærðum tölum á vefnum covid.is. Tveir eru á sjúkrahúsi vegna Covid-19 en aðeins einn lá inni í gær. Alls hefur 341 greinst með veiruna síðustu níu sólarhringa.

Þrjú smit greindust á landamærum þar sem niðurstöðu mótefnamælingar er beðið í öllum tilfellum.

Af þeim 33 sem greindust innanlands var um 36 einkennasýni að ræða og níu við sóttkvíar- og handahófsskimun.

400 manns eru nú í einangrun, samanborið við 352 í gær. Þá fækkar þeim sem eru í sóttkví, eru 2.362 í dag en voru 2.486 í gær.

Nýgengi innanlandssmita, þ.e. fjöldi smitaðra á hverja 100 þúsund íbúa undanfarnar tvær vikur er nú 103,1 en var 91,1 í gær. Þá er nýgengi landamærasmita nú 5,2 en var 4,1, í gær.

Nú hafa 2.561 manns greinst smitaðir af kórónuveiru frá upphafi faraldursins. Tíu þeirra sem hafa veikst af Covid-19 eru látnir.

Alls voru tekin 1.365 einkennasýni hjá sýkla- og veirufræðideild Landspítalans og Íslenskri erfðagreiningu í gær og 494 sýni á landamærunum eða í seinni landamæraskimun. Þá voru 176 sýni tekin í annarri skimun hjá Íslenskri erfðagreiningu og 689 sýni tekin við sóttkvíar- og handahófsskimun.

Fréttin hefur verið uppfærð.

Faraldur kórónuveiru (COVID-19)

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.