Vodafone hóf í dag uppbyggingu á 5G-kerfi á Íslandi en fyrsti sendir fyrirtækisins er staðsettur við höfuðstöðvar þess á Suðurlandsbraut.

Í tilkynningu frá félaginu segir að stefnt sé á öfluga uppbyggingu 5G næstu árin, meðal annars í gegnum Sendafélagið sem sé í sameiginlegri eigu Vodafone og Nova. 5G sé fimmta kynslóð farsímakerfa sem bjóði upp á allt að tífalt meiri hraða en 4G með meðalhraða upp á 150-200Mb á sekúndu.

Vodafone starfrækir í dag 4G kerfi sem nær til 99,7 prósent landsmanna og muni áfram verða unnið að uppbyggingu þess samhliða 5G.

Haft er eftir Heiðari Guðjónssyni, forstjóra Vodafone, að Vodafone hafi verið leiðandi í IoT (Internet of Things) lausnum hér á landi og starfað með fjöldamörgum fyrirtækjum og sveitarfélögum á því sviði síðustu ár. 

„5G mun styrkja stöðu okkar enn frekar auk þess að opna á spennandi möguleika hvað varðar nettengingar fyrir heimilin í landinu. Áhrif 5G munu verða fyrir heimili og fyrirtæki svipuð og 4G var fyrir einstaklinga á sínum tíma,“ segir Heiðar.

Vísir er í eigu Sýnar.